Newcastle បំពានច្បាប់UEFA មុនការប្រកួតUCLជាលើកដំបូងក្នុងពេលជាង២ទសវត្សរ៍

Premier League
September 19th, 2023 (2 years)
1172 Views
Share

ក្រុម Newcastle United បានបំពានច្បាប់របស់សហព័ន្ធកីឡាបាល់ទាត់ទ្វីបអឺរ៉ុប (UEFA) ដោយអចេតនាលើការរៀបចំសម្រាប់ការប្រកួត Champions League បន្ទាប់ពីជើងហោះហើររបស់ពួកគេទៅកាន់ទីក្រុង Milan ត្រូវបានពន្យារពេលជាងពីរម៉ោង ដោយសារព្យុះនៅប្រទេសអ៊ីតាលី។

លោក Eddie Howe និងកូនក្រុម Newcastle របស់គាត់ បានចេញដំណើរយឺត ២ម៉ោង ២០នាទីពីទីក្រុង Newcastle សម្រាប់ជើងហោះហើររបស់ពួកគេទៅកាន់ភាគខាងជើងនៃប្រទេសអ៊ីតាលី។

តាមច្បាប់របស់ UEFA កំណត់ថា ក្រុមនីមួយៗត្រូវធ្វើសន្និសីទសារព័ត៌មានមុនការប្រកួតរបស់ពួកគេ នៅចន្លោះម៉ោង ១២ ថ្ងៃត្រង់ដល់ម៉ោង ៨ យប់ ម៉ោងក្នុងស្រុក មួយថ្ងៃមុនពេលការប្រកួត។

ប៉ុន្តែព្យុះបានបោកបក់កាត់ទីក្រុង Milan នៅម៉ោង ៥ ល្ងាច បន្ទាប់ពីយន្តហោះរបស់ Newcastle បានហោះឡើង ប៉ុន្តែវាមិនច្បាស់ទេថាតើនោះជាមូលហេតុនៃការពន្យារពេលនេះ ឬយ៉ាងណា។

នៅពេលដែលក្រុមសារិកាព្រៃបានទៅដល់កីឡដ្ឋាន San Siro លោក Eddie Howe បានប្រាប់ថា អាកាសធាតុគឺជាហេតុផលសម្រាប់ការពន្យារពេលរបស់ពួកគេ ហើយថាពួកគេបានរង់ចាំនៅលើយន្តហោះអស់រយៈពេលជិតពីរម៉ោង មុនពេលចេញដំណើរ។

សន្និសីទសារព័ត៌មានរបស់ Newcastle បានចាប់ផ្តើមនៅម៉ោង ៩ យប់ ជាងពីរម៉ោងក្រោយការគ្រោងទុក។ ទោះជាយ៉ាងណា សារព័ត៌មាន Daily Mail រាយការណ៍ថា ការបំពានច្បាប់នេះ គ្រាន់តែទទួលការព្រមានពី UEFA មិនមានការដាក់ពិន័យធ្ងន់ធ្ងរឡើយ។

ការប្រកួតរវាង AC Milan ទល់នឹង Newcastle ពូល F ក្របខណ្ឌ UEFA Champions League នឹងធ្វើឡើងនៅម៉ោង ១១:៤៥ នាទីយប់នេះ ដែលជាការប្រកួតលើកដំបូងរបស់ក្រុមសារិកាព្រៃ ចាប់តាំងពីពួកគេបានយកឈ្នះលើ Barcelona ដោយលទ្ធផល ៣-២ កាលពី២៦ឆ្នាំមុន៕

អត្ថបទទាក់ទង