ខ្សែប្រយុទ្ធ Harry Kane ថាមិនអាចមើលស្រាល Man UTD ទេ មុនត្រូវប៉ះគ្នា ក្នុងពានរង្វាន់ UEFA Champions League

Premier League
September 20th, 2023 (1 year)
738 Views
Share

ខ្សែប្រយុទ្ធ Harry Kane របស់ Bayern Munich បានទទួលស្គាល់ថា Manchester United កំពុងជួបប្រទះជាមួយនឹងស្ថានភាពដ៏លំបាក ប៉ុន្តែគេទទូចថាក្រុមរបស់ខ្លួន មិនអាចមើលស្រាលក្រុមគូប្រជែងមួយនេះបានឡើយ ពេលត្រូវប៉ះគ្នា នៅក្នុងពានរង្វាន់ UEFA Champions League។

ជាការពិត Manchester United បានជួបប្រទះនូវការចាប់ផ្តើមរដូវកាលមិនបានល្អនោះឡើយ ដោយបានចាញ់បីប្រកួត ក្នុងចំណោមការ ៥ ប្រកួតដំបូងរបស់ខ្លួន នៅក្របខណ្ឌ Premier League រួមទាំងការចាញ់ក្រុម Brighton ដោយលទ្ធផល ៣–១ ក្នុងដីខ្លួនឯងផងដែរ។

យ៉ាងណាមិញ ក្រុម Bayern Munich នឹងត្រូវស្វាគមន៍ Manchester United សម្រាប់ការប្រកួតបើកឆាកក្នុងពូល A ក្នុងពានរង្វាន់ UEFA Champions League ហើយបើទោះបីជាការចាប់ផ្តើមរដូវកាលមិនល្អក៏ដោយ តែ Harry Kane យល់ថា Manchester United មិនមែនជាក្រុមអាចមើលស្រាលបាននោះឡើយ។

មុនការប្រកួតរវាងក្រុមទាំង២ចូលមកដល់ Harry Kane បាននិយាយនៅកិច្ចសម្ភាសយ៉ាងដូច្នេះថា៖ “ខ្ញុំកំពុងរំពឹងថានឹងមានការប្រកួតដ៏លំបាកមួយ។ ខ្ញុំដឹងថា Manchester United កំពុងតែជួបបញ្ហានៅពេលនេះ ប៉ុន្តែពួកគេគឺនៅតែមានគ្រោះថ្នាក់ណាស់សម្រាប់ការប្រកួត ពីព្រោះពួកគេតែងតែសម្លឹងរកមើលការវិលត្រលប់មកវិញនូវវិធីដ៏ធំមួយ ” ។

Kane បន្តទៀតថា៖ “យើងត្រូវតែត្រៀមខ្លួនសម្រាប់ពួកគេ ហើយពិតណាស់យើងចង់ធ្វើអោយក្រុមអ្នកគាំទ្រ ជាអ្នកផ្តល់ការលើកទឹកចិត្ត ហើយវានឹងក្លាយជាការប្រកួតដ៏ស្ថិតស្វាញបំផុតមួយ។”

សូមបញ្ជាក់ថា ការប្រកួត រវាង Bayern Munich និង Manchester United នឹងត្រូវធ្វើឡើងនាយប់នេះ នាកីឡដ្ឋាន Allianz Arena៕

អត្ថបទទាក់ទង