គ្រូ Liverpool ថា ក្រុមខ្លួននឹងធ្វើឱ្យបានល្អបំផុតសម្រាប់ការប្រកួត UEFA Europa League

Premier League
September 21st, 2023 (1 year)
611 Views
Share

លោក Jurgen Klopp គ្រូបង្វឹក Liverpool បាននិយាយកាលពីពេលថ្មីៗនេះថា ក្រុមរបស់លោកបានត្រៀមខ្លួនរួចរាល់ក្នុងការប្រកួត UEFA Europa League រដូវកាលនេះ ហើយគ្រប់គ្នានឹងធ្វើឱ្យបានល្អបំផុត បន្ទាប់ពីបានខកខានកៅអីពានរង្វាន់ UEFA Champions League រួចមក។

ជាការពិត ក្រុមហង្សក្រហមបានបញ្ចប់ក្នុងចំណាត់ថ្នាក់លេខ៥នៅក្របខណ្ឌ Premier League រដូវកាលមុន ដែលជាចំណាត់ថ្នាក់ទាបបំផុតសម្រាប់ការដឹកនាំរបស់លោក Jurgen Klopp ជាមួយ Liverpool។ នេះវាបានធ្វើឱ្យ Liverpool ត្រូវមកលេងពានកំពូលទី២របស់អឺរ៉ុបជំនួសវិញ។

ទោះយ៉ាងណា លោក Klopp បាននិយាយដាស់តឿនក្រុមលោក ដោយឱ្យចាត់ទុកការប្រកួតគ្រប់ក្របខណ្ឌជាការប្រកួតធំៗ ដែលកូនក្រុមលោកត្រូវយកចិត្តទុកដាក់ និងចង់ឱ្យ Liverpool ឡើងដល់វគ្គក្រោយៗទៀតក្នុងការប្រកួត Europa League ទៅតាមអ្វីដែលក្រុមលោកអាចធ្វើបាន តែអ្វីដែលសំខាន់នោះគឺក្រុមលោកត្រៀមខ្លួនរួចរាល់ក្នុងការប្រកួតនេះ។

គ្រូបង្វឹកជនជាតិអាល្លឺម៉ង់ បានឱ្យដឹងដូច្នេះថា៖ “ខ្ញុំចង់ឱ្យគ្រប់គ្នាគោរពនិងយកចិត្តទុកដាក់ គ្រប់ការប្រកួតទាំងអស់ ហើយវាជារឿងត្រឹមត្រូវ។ យើងមានការប្រកួតដ៏ធំ ហើយគ្រប់គូប្រជែងដែលមកប្រកួតជាមួយយើង គឺយើងត្រូវតែត្រៀមខ្លួនឱ្យរួចរាល់ ១០០ភាគរយ។”

លោក Jurgen Klopp បានបន្តថា៖ “យើងចង់ឡើងទៅដល់វគ្គជ្រៅ ហើយខ្ញុំកាន់តែពេញចិត្តបើយើងឡើងដល់វគ្គផ្តាច់ព្រ័ត្រ។ យ៉ាងណា យើងមានរឿងរ៉ាវជាច្រើននៅចំពោះមុខ តែពួកយើងនឹងនៅតែព្យាយាមធ្វើឱ្យបានល្អបំផុត រាល់ការប្រកួតទាំងនោះ។”

សូមបញ្ជាក់ថា Liverpool បានផ្គូផ្គងចូលពូល E ក្នុងពានរង្វាន់ UEFA Europa League រួមជាមួយក្រុម LASK របស់អូទ្រីស Union Saint-Gilloise របស់បែលហ្ស៊ីក និង Toulouse របស់បារាំង។ ក្រុមហង្សក្រហមនឹងចាប់ផ្តើមយុទ្ធនាការប្រកួតពានរង្វាន់កំពូលទី២អឺរ៉ុប ដោយត្រូវទៅជួបក្រុម LASK នាយប់នេះ៕

អត្ថបទទាក់ទង