Wayne Rooney ព្រមព្រៀងចែកផ្លូវជាមួយក្លិប DC United

Premier League
October 10th, 2023 (1 year)
474 Views
Share

គ្រូបង្វឹក លោក Wayne Rooney បានឈានដល់ការព្រមព្រៀងចែកផ្លូវគ្នាជាមួយក្លិប DC United។ នេះបើតាមការប្រកាសពីក្លិបនៅក្របខណ្ឌ Major League Soccer។

អតីតខ្សែប្រយុទ្ធអង់គ្លេស និងក្លិប Manchester United បានលេងជាកីឡាករឱ្យ DC United នៅ ចន្លោះឆ្នាំ ២០១៨-១៩ មុនពេលវិវឌ្ឈខ្លួនក្លាយជាគ្រូបង្វឹកចូលដឹកនាំក្លិបដែលមានមូលដ្ឋាននាទីក្រុង Washington កាលពីខែកក្កដា ឆ្នាំ ២០២២។

DC United បានខកខានការប្រកួតជម្រុះ MLS Cup ជាលើកទី៤ ជាប់ៗគ្នា បើទោះបីជាបានឈ្នះដោយលទ្ធផល ២-០ នៅក្នុងវគ្គផ្តាច់ព្រ័ត្រនៃរដូវកាលរបស់ពួកគេទៅលើក្រុម New York City FC ដោយពួកគេបញ្ចប់ជាមួយពិន្ទុ៤០ ពិន្ទុ។

អតីតគ្រូបង្វឹកនៃក្លិបលីគលំដាប់ទី ៣ អង់គ្លេស Derby County បាននិយាយថា រូបលោកបានធ្វើអ្វីគ្រប់យ៉ាងដើម្បីឱ្យ DC United ចូលលេងក្នុងវគ្គ Playoff ដោយបន្ថែមថា វាជាពេលវេលាត្រឹមត្រូវ ដើម្បីបន្តទៅមុខទៀត។

នាយកប្រតិបត្តិ និងជាសហប្រធានរបស់ DC United លោក Jason Levien បាននិយាយនៅក្នុងសេចក្តីថ្លែងការណ៍មួយថា៖ “យើងបាននិយាយជាមួយ Wayne ហើយបានយល់ព្រមថា វាជាការល្អបំផុតសម្រាប់ពួកយើងក្នុងការចែកផ្លូវនៅពេលនេះ។ យើងមានអំណរគុណចំពោះ Wayne Rooney សម្រាប់អ្វីទាំងអស់ដែលគាត់បានធ្វើសម្រាប់ក្លិបរបស់យើង និងសម្រាប់បាល់ទាត់នៅក្នុង Nation’s Capital ជាលើកដំបូងក្នុងនាមជាកីឡាករ និងជាប្រធានក្រុមរបស់ DC United ហើយថ្មីៗនេះជាគ្រូបង្វឹករបស់យើង។”

ដោយឡែក ក្រោយការចាកចេញពី DC United ហើយ លោក Wayne Rooney ក៏ត្រូវបានផ្សារភ្ជាប់ទៅនឹងការផ្លាស់ទៅដឹកនាំ ក្លិបលីគទី២អង់គ្លេស Birmingham City ដែលទើបតែបញ្ចប់តំណែងគ្រូបង្វឹកលោក John Eustace បន្ទាប់ពីរូបលោកដឹកនាំបាន១៥ខែរួចមក៕

អត្ថបទទាក់ទង