Sandro Tonali ត្រូវបានព្យួររយៈពេល១០ខែសម្រាប់ការបំពានច្បាប់ភ្នា ល់ល្បែង

Premier League
October 27th, 2023 (2 years)
474 Views
Share

ខ្សែបម្រើកណ្តាលរបស់ Newcastle United និងក្រុមជម្រើសជាតិអ៊ីតាលី Sandro Tonali ត្រូវបានសហព័ន្ធបាល់ទាត់អ៊ីតាលី (FIGC) សម្រេចព្យួររយៈពេល ១០ ខែពីបទបំពានច្បាប់ភ្នាល់ល្បែង។

កីឡាករវ័យ ២៣ឆ្នាំ នឹងត្រូវអវត្តមានរហូតដល់ខែសីហា ឆ្នាំ២០២៤ ហើយនឹងមិនអាចចូលរួមនៅក្នុងព្រឹត្តិការណ៍ Euro 2024 ប្រសិនបើអ៊ីតាលីមានសិទ្ធិចូលលេង។

កាលពីដើមខែនេះ ខ្សែបម្រើ Nicolo Fagioli របស់ Juventus ក៏បានទទួលបម្រាមដូចគ្នារយៈពេល ៧ ខែពី FIGC សម្រាប់ការបំពានច្បាប់ភ្នាល់ល្បែង។ FIGC បានបញ្ជាក់ថា Tonali បានបំពានច្បាប់ដែលហាមឃាត់មិនឱ្យចូលរួមនៅក្នុងព្រឹត្តិការណ៍បាល់ទាត់ដែលរៀបចំដោយ FIGC, UEFA និង FIFA ហើយគាត់ក៏ត្រូវបានពិន័យជាប្រាក់ចំនួន ២ម៉ឺនអឺរ៉ូផងដែរ។

Tonali បានចូលរួមជាមួយ Newcastle ពី AC Milan ក្នុងខែកក្កដា ក្នុងតម្លៃ ៥៥ លានផោន។ រូបគេបានលេងនៅលើទីលានប្រកួតក្នុងអំឡុងពេលដែល Newcastle ចាញ់ Borussia Dortmund ១-០ ក្នុងក្របខណ្ឌ Champions League ក្នុងសប្ដាហ៍នេះ។ Tonali បានបង្ហាញខ្លួនចំនួន ១២ លើកសម្រាប់ក្រុមរបស់លោក Eddie Howe ចាប់តាំងពីការផ្ទេរពី AC Milan ។

Newcastle ដែលកំពុងឈរនៅចំណាត់ថ្នាក់លេខ ៦ ក្នុងក្របខណ្ឌ Premier League នឹងធ្វើដំណើរទៅជួបក្រុម Wolves នៅថ្ងៃសៅរ៍ មុនពេលជួប Manchester United ក្នុងជុំទី៤ នៃពានរង្វាន់ Carabao Cup នៅថ្ងៃព្រហស្បតិ៍សប្ដាហ៍ក្រោយ៕

អត្ថបទទាក់ទង