ខ្សែប្រយុទ្ធ Erling Haaland គេចផុតទណ្ឌកម្ម តែក្លិប Man City នៅតែរងពិន័យ

Premier League
December 7th, 2023 (1 year)
476 Views
Share

សែប្រយុទ្ធ Erling Haaland បានគេចផុតពីការពិន័យពីសមាគមបាល់ទាត់អង់គ្លេស FA ចំពោះប្រតិកម្មទៅលើការកាត់ក្តីមិនសមរម្យរបស់ អាជ្ញាកណ្តាល លោក Simon Hooper នៅលើបណ្តាញសង្គម អំឡុងការប្រកួតរវាង Man City ស្មើ ៣-៣ Tottenham Hotspur កាលពីសប្តាហ៍មុន ប៉ុន្តែ Man City នៅតែរងពិន័យដដែលចំពោះការបរាជ័យគ្រប់គ្រងអាកប្បកិរិយាកីឡាករខ្លួន។

Haaland បានឆ្លើយតបទៅលើវីដេអូឃ្លីប ដោយបានសរសេរពាក្យមិនសមរម្យ ដោយវីដេអូនោះ បង្ហាញអំពីរូបគេបានស្រែកប្រកែកគ្នាជាមួយនឹងលោក Simon Hooper ចំពោះការសម្រេចចិត្តផ្លុំកញ្ចែរពិន័យទៅលើការប៉ះគ្នារបស់រូបគេជាមួយនឹងកីឡាករក្រុម Spurs ស្របពេលដែលមិត្តរួមក្រុម Jack Grealish កំពុងមានឱកាសអូសបាល់សំដៅរកការស៊ុតបញ្ចូលទីរកគ្រាប់បាល់។

យ៉ាងណា បញ្ហានេះ FA បានអះអាងថា កីឡាករវ័យ ២៣ឆ្នាំ មិនបានល្មើសច្បាប់អ្វីឡើយចំពោះការបង្ហោះបញ្ចេញមតិនៅលើបណ្តាញសង្គម។

ទោះជាកីឡាករបានរួចខ្លួនពីការចោទប្រកាន់ និងការដាក់ពិន័យ តែយ៉ាងណាទង្វើរបស់កីឡាករក្រុម Man City បានធ្វើឱ្យ FA សម្រេចចិត្តបែរទៅដាក់ពិន័យចំពោះក្លិប Man City ទៅវិញ ដោយចាត់ទុកថាក្លិបបានបរាជ័យក្នុងការគ្រប់គ្រងអាកប្បកិរិយារបស់កីឡាករខ្លួនក្នុងការប្រកួត។

ជាក់ស្តែង Haaland ដែលរួមជាមួយនឹងកីឡាករខ្សែការពារ Ruben Diaz និង Mateo Kovacic បានចោមរោមទៅលើលោក Hooper សម្រាប់តវ៉ាការសម្រេចចិត្តពិន័យ។

សេចក្តីថ្លែងការណ៍របស់ FA ឱ្យដឹងថា៖ “Manchester City ត្រូវបានពិន័យចំពោះការល្មើសច្បាប់របស់ FA បន្ទាប់កីឡាករបានចោមរោមលើមន្ត្រីអាជ្ញាកណ្តាលការប្រកួតអំឡុងការប្រកួតក្នុងក្របខណ្ឌ Premier League ទល់នឹងក្រុម Tottenham Hotspur កាលពីថ្ងៃទី៣ ខែធ្នូ ឆ្នាំ ២០២៣។ Man City នៅសល់ពេលវេលាត្រឹមថ្ងៃទី៧ ខែធ្នូ សម្រាប់ការឆ្លើយតបទៅលើបញ្ហាទាំងអស់។”

បើតាមប្រភពពី FA បានបញ្ជាក់ថាក្រុមកីឡាករ និងក្រុមគ្រូបង្វឹក បុគ្គលិករបស់ក្លិបមិនត្រូវបានរងការពិន័យឡើយ៕

អត្ថបទទាក់ទង