គ្រូ Aston Villa ថា ក្រុមខ្លួនមិនមែនក្រុមប្រជែងពាន Premier League នោះទេ

Premier League
December 8th, 2023 (1 year)
741 Views
Share

លោក Unai Emery សារភាពថា Aston Villa មិនមែនជាក្រុមប្រជែងពាន Premier League រដូវកាលនេះ បើទោះក្រុមខ្លួនទើបឈ្នះក្រុមការពារតំណែងជើងឯក Man City ១-០ ក៏ដោយ។

ជ័យជម្នះនេះ បានជួយ Aston តាមស្មើកំណត់ត្រារបស់ Man City ដែលឈ្នះប្រកួតក្នុងដី១៤លើកជាប់ៗគ្នា និងថែមទាំងដណ្តើមបានចំណាត់ថ្នាក់លេខ៣ ពីក្រុមខ្លាំងនេះថែមទៀត។

យ៉ាងណាក៏ដោយ លោក Emery លើកឡើងថា វាជាពេលវេលាលឿនពេកសម្រាប់ Aston Villa ក្នុងការក្លាយជាគូប្រជែងដណ្តើមពានលីគកំពូលរបស់អង់គ្លេស។

គ្រូបង្វឹកសញ្ជាតិអេស្ប៉ាញ សារភាពថាកូនក្រុមខ្លួននៅមានការងារជាច្រើន និងវែងឆ្ងាយទៀត ដើម្បីតាមទាន់ក្រុមខ្លាំងដូចជា Man City, Arsenal និង Liverpool ជាដើម។

លោក Emery បានឱ្យដឹងដូច្នេះថា៖ “យើងមិនមែនជាគូប្រជែងទេ។ នៅលីគកំពូលអង់គ្លេសមានក្រុម ៧ ដែលមានសមត្ថភាពជាង Aston ដើម្បីប្រជែងពាន។ យើងទើបឆ្លងកាត់១៥ប្រកួតប៉ុណ្ណោះ។ ប៉ុន្តែយើងរីករាយក្នុងការទទួលបានចំណាត់ថ្នាក់លេខ ៣។”

ឆ្លងកាត់១៥ប្រកួត Aston Villa ឈ្នះ១០ ចាញ់២ និងស្មើ៣ ទទួលបាន៣២ពិន្ទុ ស្ថិតនៅចំណាត់ថ្នាក់លេខ៣ ជាបណ្តោះអាសន្ន ដោយរុញម្ចាស់ការពារជើងឯក Man City ទៅលេខ៤វិញ ដោយមាន៣០ពិន្ទុ៕

អត្ថបទទាក់ទង