គ្រូ Arsenal ថាដោយសារតែបញ្ហាអាកាសធាតុទើបរបូតឱកាសឈ្នះ Aston Villa

Premier League
December 11th, 2023 (1 year)
431 Views
Share

គ្រូបង្វឹក Arsenal លោក Mikel Arteta បានចេញមុខប្រាប់ពីហេតុផល ដោយសំអាងថាព្រោះតែបញ្ហាអាកាសធាតុ ទើបធ្វើឱ្យក្រុមកាំភ្លើងធំរបស់លោក មិនអាចវាយបករកគ្រាប់បាល់វិញបាន បន្ទាប់ពីចាញ់ Aston Villa ដោយលទ្ធផល ១–០ កាលពីចុងសប្តាហ៍កន្លងទៅ។

នេះជាការចាញ់ជាលើកទីពីរហើយសម្រាប់ Arsenal នៅក្នុងរដូវកាលនេះ នៅឯកីឡដ្ឋាន Villa Park បន្ទាប់ពីគ្រាប់បាល់ស៊ុតបញ្ចូលទីនៅនាទីទី ៧ របស់កីឡាករ John McGinn ដែលជួយឱ្យក្រុមរបស់គ្រូបង្វឹកលោក Unai Emery រកបានបីពិន្ទុពេញ។

យ៉ាងណាមិញ នៅពេលដែលត្រូវបានសួរថា តើមានអ្វីត្រូវការកែលម្អក្រុមបន្ថែមទៀតឬយ៉ាងណាក្រោយការបរាជ័យនោះ លោក Arteta បានឆ្លើយវិញថា ក្រុមរបស់លោកលេងបានល្អទេ ប៉ុន្តែដោយសារបញ្ហា អាកាសធាតុខ្យល់ខ្លាំងពេក ទើបធ្វើឱ្យក្រុមរបស់លោករបូតឱកាសឈ្នះការប្រកួត។

គ្រូបង្វឹកជនជាតិអេស្ប៉ាញ បានឱ្យដឹងដូច្នេះថា៖ “ខ្ញុំគិតថាថ្ងៃនេះមានខ្យល់ខ្លាំងបន្តិច អ្នកប្រហែលជាបានឃើញហើយថាបាល់រត់ខុសកន្លែងច្រើន ហើយការប៉ះបាល់មិនត្រូវតាមគោលដៅឡើយ។ ខ្ញុំមិនដឹងអ្វីច្បាស់ទៀតទេ។ ប៉ុន្តែប្រាកដណាស់ខ្ញុំមានទំនួលខុសត្រូវចំពោះការបរាជ័យនេះ ហើយចាំបាច់ត្រូវពង្រឹងក្រុមបន្ថែមទៀត។ ត្រូវហើយ ខ្ញុំត្រូវទទួលស្គាល់ចំពោះការចាញ់នេះ។”

ឆ្លងកាត់១៦ប្រកួតកន្លងមកនៅក្នុងក្របខណ្ឌ Premier League រដូវកាលនេះ ក្រុម Arsenal មាន៣៦ពិន្ទុ ឈរលេខ២ ពីក្រោមក្រុមកំពូលតារាង Liverpool តែ១ពិន្ទុ និងពីលើក្រុមលេខ៣ Aston Villa តែ១ពិន្ទុ ប៉ុណ្ណោះ៕

អត្ថបទទាក់ទង