គ្រូ Man City និង គ្រូជម្រើសជាតិនារីអង់គ្លេស ស្ថិតក្នុងបញ្ជីចុងក្រោយត្រៀមប្រជែងពានរង្វាន់គ្រូបង្វឹកល្អជាងគេរបស់ FIFA

Premier League
December 14th, 2023 (1 year)
400 Views
Share

គ្រូបង្វឹក Man City លោក Pep Guardiola និងគ្រូបង្វឹកក្រុមបាល់ទាត់នារីជម្រើសជាតិអង់គ្លេស អ្នកស្រី Sarina Wiegman គឺជាបេក្ខជនស្ថិតក្នុងបញ្ជីចុងក្រោយ ដើម្បីប្រជែងយកពានរង្វាន់គ្រូបង្វឹកល្អជាងគេរបស់ FIFA ពានរង្វាន់ The Best FIFA Men’s Coach and Women’s Coach Awards ។ នេះបើតាមការប្រកាសឱ្យដឹងពីសហព័ន្ធបាល់ទាត់ពិភពលោក FIFA ។

លោក Pep Guardiola ជាគ្រូបង្វឹកឈានមុខគេដែលអាចឈ្នះពានរង្វាន់ខាងដើមនេះ បន្ទាប់ពីរូបលោកបានជួយ Man City ឈ្នះពានរង្វាន់ធំៗចំនួន៣កាលពីរដូវកាលមុន ដែលមានពានរង្វាន់ Premier League, FA Cup និង UEFA Champions League ។

ក្រៅពី លោក Guardiola ហើយលោក Simone Inzaghi ដែលបានដឹកនាំ Inter Milan ទៅកាន់វគ្គផ្តាច់ព្រ័ត្រ UEFA Champions League និងបានឈ្នះពាន Coppa Italia ផងដែរនោះ ជាបេក្ខភាពទី២ដែលនឹងមកប្រកួតប្រជែងពានគ្រូបង្វឹកឆ្នើមរបស់ FIFA ។ អ្នកចុងក្រោយទីបីគឺ លោក Luciano Spalletti ដែលបានបញ្ចប់ភាពរាំងស្ងួតរយៈពេល ៣៣ ឆ្នាំរបស់ Napoli នៅពេលដែលពួកគេបានឈ្នះពានរង្វាន់ Serie A ជាមួយនឹងការប្រកួតចំនួន ៥ ដែលនៅសល់មុនបញ្ចប់រដូវកាល។

ខាងផ្នែកនារីវិញ អ្នកស្រី Sarina Wiegman ដែលជាអ្នកឈ្នះពានរង្វាន់ The Best FIFA Women’s Coach ចំនួន៣ដងរួចមកហើយនោះ បានសាងស្នាដៃយ៉ាងលេចធ្លោនាពេលកន្លងមក។ អ្នកស្រី Wiegman បានដឹកនាំក្រុមនារីអង់គ្លេសទៅកាន់វគ្គផ្តាច់ព្រ័ត្រដ៏សំខាន់មួយ គឺក្នុងពានរង្វាន់ការប្រកួតបាល់ទាត់ពិភពលោកនារី ប៉ុន្តែពួកគេបានចាញ់ក្រុមនារីអេស្ប៉ាញដោយលទ្ធផល ១-០ ។

បេក្ខភាពលេចធ្លោមួយទៀតដែលនឹងមកប្រជែងពានរង្វាន់ The Best FIFA Women’s Coach នោះគឺអ្នកស្រី Jonatan Giraldez ដែលបានដឹកនាំក្រុមនារី Barcelona ឈ្នះជើងឯកលីគ ដោយចាញ់តែមួយប្រកួតប៉ុណ្ណោះកាលពីរដូវកាលមុន។ អ្នកស្រី ក៏បានជួយក្រុមនារី Barcelona ឈ្នះពានរង្វាន់ UEFA Champions League ជាលើកទីពីររបស់ពួកនាងផងដែរ។

គ្រូបង្វឹកក្រុមនារី Chelsea អ្នកស្រី Emma Hayes គឺជាបេក្ខភាពចុងក្រោយទីបីដែលនឹងមកប្រជែងពានរង្វាន់ បន្ទាប់ពីរដូវកាលដ៏ជោគជ័យមួយទៀតដែលពួកនាងបានឈ្នះពានរង្វាន់ FA Women’s Super League និង FA Cup ។ អ្នកស្រី Hayes នឹងចាកចេញពី Chelsea នាខែឧសភាឆ្នាំក្រោយ ដើម្បីមកកាន់តួនាទីជាគ្រូបង្វឹកក្រុមបាល់ទាត់ជម្រើសជាតិនារីសហរដ្ឋអាមេរិក។

សម្រាប់ ការប្រកាសអ្នកឈ្នះពានរង្វាន់ The Best FIFA Men’s Coach and Women’s Coach នឹងធ្វើឡើងនៅថ្ងៃទី ១៥ ខែមករា នៅទីក្រុងឡុងដ៍ ប្រទេសអង់គ្លេស។

ការផ្សាយបន្តផ្ទាល់ការប្រកួតសប្ដាហ៍ទី១៧ នៃក្របខណ្ឌ Premier League របស់ CBS ៖
Man City Vs Crystal Palace ថ្ងៃសៅរ៍ ទី១៦ ធ្នូ ម៉ោង៩:៥៥នាទីយប់ នៅ MyTV
Arsenal Vs Brightonថ្ងៃអាទិត្យ ទី១៧ ធ្នូ ម៉ោង៨:៥៥នាទីយប់ នៅ MyTV
Liverpool Vs Man Utd ថ្ងៃអាទិត្យ ទី១៧ ធ្នូ ម៉ោង១១:២៥នាទីយប់ នៅ CTN ៕

អត្ថបទទាក់ទង