ក្របខណ្ឌ Premier League ប្រឈមនឹងសម្ពាធ ក្រោយក្របខណ្ឌ La Liga ប្រកាសកិច្ចព្រមព្រៀងថ្មីករណី VAR

Premier League
December 21st, 2023 (1 year)
858 Views
Share

ក្របខណ្ឌបាល់ទាត់កំពូលអង់គ្លេស Premier League កំពុងប្រឈមមុខនឹងសម្ពាធសាជាថ្មី បន្ទាប់ពី ក្របខណ្ឌកំពូលអេស្ប៉ាញ La Liga ប្រកាសអំពីកិច្ចព្រមព្រៀងថ្មី ដោយការសន្ទនារវាងអាជ្ញាកណ្តាលលើទីលាន និងមន្ត្រីបន្ទប់វីដេអូ VAR នឹងត្រូវបានបង្ហាញជាសាធារណៈ។

សហព័ន្ធបាល់ទាត់អេស្ប៉ាញ RFEF និងក្របខណ្ឌ La Liga បានយល់ព្រមនឹងដំណើរការកិច្ចព្រមព្រៀងថ្មី ចាប់ពីខែក្រោយតទៅ។ កិច្ចព្រមព្រៀងថ្មីនេះ មានន័យថា នៅក្នុងឆ្នាំ ២០២៤ ស្ថាប័នទាំងពីរនឹងធ្វើការថតរូបភាព និងសំឡេងសន្ទនារវាងមន្ត្រីអាជ្ញាកណ្តាលលើទីលាន និងមន្ត្រីនៅបន្ទប់ VAR ជុំវិញការសម្រេចចិត្តដ៏ចម្រូងចម្រាសនៅរាល់ការប្រកួតនីមួយៗរបស់ក្របខណ្ឌ La Liga ។ យ៉ាងណា ការសន្ទនាមិនអាចផ្សាយផ្ទាល់ភ្លាមៗបានទេ ដោយសារច្បាប់របស់ក្រុមប្រឹក្សាភិបាលសមាគមបាល់ទាត់អន្តរជាតិ IFAB មិនផ្តល់ការអនុញ្ញាត។

កិច្ចព្រមព្រៀងខាងដើម គឺជាជំហានដ៏សំខាន់មួយ ដែលបច្ចុប្បន្នត្រូវបានហាមឃាត់ដោយ IFAB ដែលផ្តល់អាជ្ញាបណ្ណ VAR សម្រាប់ប្រើប្រាស់នៅក្នុងការប្រកួតនានា។

RFEF បានបញ្ជាក់ថា ការផ្សាយរូបភាព និងសំឡេងសន្ទនា នឹងកើតឡើងនៅពេលការប្រកួតនីមួយៗបានបញ្ចប់ បទពិសោធអ្នកគាំទ្រនឹងប្រសើរឡើង ហើយការយល់ដឹងកាន់តែច្រើនអំពីការសម្រេចចិត្តរបស់អាជ្ញាកណ្តាលនឹងត្រូវផ្សព្វផ្សាយ ធ្វើឱ្យការប្រកួតកាន់តែប្រសើរឡើង។

ដោយឡែក បន្ទាប់ពីការប្រកាសរបស់ RFEF និង La Liga សម្ពាធថ្មីមួយ ត្រូវបានមើលឃើញថា ធ្លាក់លើក្របខណ្ឌ Premier League ដែលបានក្លាយជាប្រធានបទជជែកវែកញែកកាន់តែខ្លាំង។

ជុំវិញរឿងនេះ អតីតអាជ្ញាកណ្តាលបាល់ទាត់ និងជាប្រធានគណៈកម្មាធិការរៀបចំការប្រកួតបាល់ទាត់អង់គ្លេស PGMOL លោក Keith Hackett បានថ្លែងថា បាល់ទាត់អង់គ្លេស ពិតជាត្រូវធ្វើតាមការដឹកនាំរបស់បាល់ទាត់អេស្ប៉ាញហើយវាគ្មានសំណួរដែលថា ពួកគេត្រូវមានតម្លាភាពជាងនេះទេ។

កិច្ចព្រមព្រៀងរវាង La Liga និង VAR នឹងក្លាយជាជំហានក្នុងទិសដៅដែលអ្នកគាំទ្រភាគច្រើនចង់បាន ហើយវាស្ទើរតែនឹងលុបបំបាត់ការរិះគន់ ការសម្រេចចិត្តរបស់អាជ្ញាកណ្តាលក្នុងពេលប្រកួត ព្រោះអ្នកគាំទ្រអាចវិនិច្ឆ័យដោយខ្លួនឯងបាន៕

អត្ថបទទាក់ទង