គ្រូ Chelsea ថា វិន័យមិនល្អរបស់ក្រុមដោយសារខ្វះបទពិសោធ

Premier League
December 27th, 2023 (1 year)
475 Views
Share

គ្រូបង្វឹក Chelsea លោក Mauricio Pochettino បាននិយាយថាកំណត់ត្រាកាតលឿងដ៏ច្រើនរបស់ក្រុមតោខៀវមានចំនួន ៥៦សន្លឹក អាចមកពីអាកប្បកិរិយានៃការខ្វះខាតបទពិសោធរបស់កូនក្រុមរបស់លោក។

Chelsea ត្រូវតទល់ជាមួយនឹងក្រុម Crystal Palace ជំនួបក្របខណ្ឌ Premier League ប៉ុន្តែក្រុមរហស្សនាមតោខៀវក៏ត្រូវអវត្តមានកីឡាករសំខាន់ៗដូចជាខ្សែប្រយុទ្ធ Raheem Sterling និង Cole Palmer ដោយពួកគេបានជាប់បម្រាម។

ការប្រកួតដែល Chelsea ចាញ់ក្រោមថ្វីជើង Wolverhampton Wanderers កាលពីពេលកន្លងទៅ កីឡាករ Nicholas Jackson, Malo Gusto, Connor Gallagher, Marcus Bettinelli, Sterling និង Palmer សុទ្ធសឹងតែត្រូវបានកាត់លឿងអំឡុងការប្រកួតនោះ។

Sterling និង Palmer ទទួលបានកាតលឿងចំនួន ៥លើកដូចគ្នាហើយសម្រាប់រដូវកាលនេះ ដែលជាហេតុធ្វើឱ្យពួកគេខកខានការប្រកួតទល់នឹងក្រុម Crystal Palace។

នៅពេលត្រូវបានសួរនាំអំពីបញ្ហាជាប់គាំងនៅក្នុងក្លិប Chelsea ដែលធ្វើឱ្យកីឡាករខ្វះវិន័យនៅក្នុងក្រុម លោក Pochettino បានឆ្លើយតបថា មិនមែនព្រោះតែហេតុផលបញ្ហាជាប់គាំងក្នុងក្រុមឡើយ។

គ្រូបង្វឹកជនជាតិអាហ្សង់ទីនបានថ្លែងដូច្នេះថា៖ “ទេ វាជាតំណាងនៃការពិតដែលថាយើងលេងឱ្យ Chelsea យើងជាក្លិបធំមួយ ហើយអ្នកមានអារម្មណ៍ថាមានសម្ពាធ។ នៅពេលដែលអ្នកមានការខកចិត្ត និងខ្វះបទពិសោធបន្តិច វាគឺជារឿងមួយដែលអាចកែលម្អបាន វាជារដូវកាលដំបូងរបស់ Palmer នៅ Premier League ហើយវាជារឿងធម្មតាតែប៉ុណ្ណោះ។ វាមិនមែននិយាយពីការខ្វះវិន័យនោះទេ វាគឺអំពីស្ថានភាពនៃការប្រកួត។”

ក្រុម Chelsea បច្ចុប្បន្នឈរនៅចំណាត់ថ្នាក់លេខ ១១ នៃតារាងក្របខណ្ឌ Premier League ។ ក្រោយការប្រកួតបន្ទាប់ពីជួបក្រុម Crystal Palace រួច ក្រុមស្ថិតនៅក្នុងទីក្រុងឡុងដ៍ នឹងត្រូវធ្វើដំណើរទៅកាន់ទឹកដីរបស់ Luton Town សម្រាប់ការប្រកួតនៅ ៤ថ្ងៃបន្ទាប់៕

អត្ថបទទាក់ទង