នាយកផ្នែកកីឡាក្លិប Barcelona បង្ហាញការពេញចិត្តលោក Jurgen Klopp ដើម្បីមកជំនួសលោក Xavi

Premier League
February 6th, 2024 (12 months)
348 Views
Share

នាយកផ្នែកកីឡារបស់ក្លិប Barcelona លោក Deco បានចេញមុខនិយាយកោតសរសើរចំៗទៅលើគ្រូបង្វឹក Liverpool លោក Jurgen Klopp ថាជាគ្រូបង្វឹកដ៏អស្ចារ្យម្នាក់ ចំពេលក្លិបរហស្សនាមអ្នកមានបុណ្យ កំពុងស្វែងរកបេក្ខភាពថ្មី ដើម្បីមកជំនួសតំណែងរបស់គ្រូបង្វឹកលោក Xavi ។

ជាក់ស្តែង កាលពីខែមុន លោក Xavi បានប្រកាសជាផ្លូវការរួចហើយថា លោកនឹងដើរចេញពីតំណែងជាគ្រូបង្វឹករបស់ក្លិប Barcelona នៅចុងបញ្ចប់រដូវកាលនេះ ខណៈនេះហាក់បានទុកពេលឱ្យក្លិបសល់ពេលច្រើន ដើម្បីស្វែងរកអ្នកថ្មីមកជំនួសវិញ។

ទន្ទឹមជាមួយគ្នានេះ លោក Klopp ក៏បានធ្វើការបញ្ជាក់យ៉ាងច្បាស់ផងដែរថា លោកនឹងចាកចេញពីក្លិប Liverpool នៅរដូវក្តៅខាងមុខនេះដូចគ្នា បន្ទាប់ពីចាយពេលអស់រយៈពេល ៩ឆ្នាំនៅទឹកដី Anfield ។

នៅពេលត្រូវបានសួរអំពីការផ្លាស់ប្តូរដែលអាចកើតមានណាមួយ សម្រាប់តំណែងគ្រូបង្វឹកថ្មីរបស់ក្រុម Barcelona លោក Deco បានបញ្ជាក់ថា៖ “លោក Jurgen Klopp ជាគ្រូបង្វឹកដ៏អស្ចារ្យ ប៉ុន្តែខ្ញុំគិតថាវាមិនមែនជាពេលវេលាត្រឹមត្រូវដើម្បីនិយាយអំពីរឿងទាំងនេះទេ។ គ្រូបង្វឹកថ្មីនឹងចង់ធ្វើការផ្លាស់ប្តូរ ប៉ុន្តែដំបូងយើងត្រូវពន្យល់ពីគម្រោង និងគំនិតរបស់យើងដល់ពួកគេជាមុនសិន។ ហើយបច្ចុប្បន្នយើងកំពុងមានជម្រើសជាច្រើន។”

សូមបញ្ជាក់ថា លោក Xavi Hernandes ចូលមកដឹកនាំ Barcelona នៅរដូវកាលដំបូង ២០២២-២៣ ដោយលោក បានជួយដឹកនាំក្រុមចេញពីស្ថានភាពអាក្រក់ដោយការឈ្នះពាន La Liga និង Spanish Super Cup ។ តែនៅក្នុងរដូវកាលថ្មីពានរង្វាន់ចំនួន ២ Spanish super Cup និង Copa del Rey បានរបូតអស់ ខណៈនៅសល់តែពានរង្វាន់ La Liga និងពានរង្វាន់ UEFA Champions League ប៉ុណ្ណោះ៕

អត្ថបទទាក់ទង