Arsenal រងការផាកពិន័យក្រោយកីឡាករទទួលកាតលឿងច្រើនក្នុងការប្រកួតជាមួយ Liverpool

Premier League
February 7th, 2024 (1 year)
453 Views
Share

Arsenal នឹងត្រូវរងការផាកពិន័យ ជាទឹកប្រាក់ប្រមាណ ២៥០ ០០០ ផោនក្រោយពីកីឡាកររបស់ពួកគេ បានទទួលកាតលឿងដល់ទៅ៦លើកអំឡុងការប្រកួតជាមួយ Liverpool។

ជាការពិត ការប្រកួតក្របខណ្ឌ Premier League នាទឹកដី Emirate កាលពីចុងសប្តាហ៍កន្លងទៅ Arsenal បានយកឈ្នះ ទៅលើ Liverpool ៣-១ តែការប្រកួតនោះលោកអាជ្ញាកណ្តាល Anthony Taylor បានចាយកាតច្រើនគួរសម ដោយក្រុមម្ចាស់ផ្ទះទទួលពិន័យដល់ទៅ ៦ លើក ខណៈក្រុមភ្ញៀវ ទទួលបានកាតលឿង ៤ និងកាតក្រហម ១។

កីឡាករក្រុម Arsenal ដឹកនាំដោយគ្រូបង្វឹកលោក Mikel Arteta ដែលបានបង្កកំហុសមាន Ben White, Gabriel Magalhaes, Jakub Kiwior, William Saliba, Declan Rice និង Kai Havertz។

តាមច្បាប់របស់ សមាគមបាល់ទាត់អង់គ្លេស FA បើការប្រកួត មានការពិន័យកាតលឿងចាប់ពី ៦ លើក ទៅលើកីឡាកររបស់ក្រុមមួយ នោះពួកគេនឹងត្រូវពិន័យសាច់ប្រាក់បន្ថែមទៀតក្រោយចប់ប្រកួត។ ដូច្នេះជាលទ្ធផល ខាង FA ត្រូវតែពិន័យជាទឹកប្រាក់ ទៅលើក្រុមកាំភ្លើងធំ។

ករណីស្រដៀងគ្នានេះ បានកើតឡើងរួចមកហើយ កាលពីដើមរដូវកាល ក្នុងការប្រកួតដែល Liverpool ចាញ់លើទឹកដី Tottenham Hotspur ២-១ ដោយពេលនោះកីឡាករក្រុមហង្សក្រហមត្រូវរងការពិន័យ កាតលឿង ៨ លើក រីឯការប្រកួតដែល Chelsea ចាញ់ Wolverhampton ២-១ កីឡាករក្រុមតោខៀវរងការពិន័យកាតលឿង ៦ លើក ដែលតម្រូវឱ្យក្រុមត្រូវបង់ការផាកពិន័យបន្ថែម។

សូមបញ្ជាក់ថា Arsenal កំពុងឈរលេខ ៣ នៅតារាងពិន្ទុក្របខណ្ឌ Premier League មាន ៤៩ពិន្ទុស្មើ្កក្រុមលេខ២ Man City តែនាំក្រុមកាំភ្លើងធំលេងច្រើនជាង១ប្រកួត។ ការប្រកួតបន្ទាប់ របស់ Arsenal នឹងត្រូវទៅជួបក្រុម West Ham នៅចុងសប្តាហ៍នេះ៕

អត្ថបទទាក់ទង