ខ្សែការពារ Lisandro Martinez នឹងត្រូវអវត្តមាន ៨ សប្តាហ៍ព្រោះរបួសជង្គង់

Premier League
February 8th, 2024 (2 years)
573 Views
Share

ខ្សែការពារ Lisandro Martinez របស់ Man UTD នឹងត្រូវអវត្តមានរហូតដល់ទៅ ៨ សប្តាហ៍ ឬ រហូតដល់ខែមេសា ដោយសារ របួសសរសៃពួរជង្គង់។

កីឡាករវ័យ២៦ឆ្នាំ បានទទួលរងរបួសនេះ នៅក្នុងការប្រកួតដែល Man UTD ឈ្នះ West Ham ដោយលទ្ធផល ៣-០ នៅក្នុងក្របខណ្ឌ Premier League កាលពីចុងសប្តាហ៍កន្លងទៅ។

ក្នុងការប្រកួតនោះ Martinez បានដួលក្នុងវគ្គទី២ បន្ទាប់ពីព្យាយាមការពារបាល់ពី Vladimir Coufal ហើយបើតាមការអះអាងពីក្លិបបិសាចក្រហមបានអោយដឹងថា គេមានការប៉ះពាល់ដល់ជង្គង់ស្តាំ ប៉ុន្តែសម្រាប់របួសនេះ រូបគេមិនតម្រូវឱ្យមានការវះកាត់នោះទេ។

អតីតសមាជិក Ajax ទើបតែចូលលេងវិញជាលើកទី៣ ឱ្យក្រុម Man UTD ក្រោយសម្រាកអស់រយៈពេលជាង ៣ខែ ដោយសាររបួសជើងកាលពីខែតុលាកន្លងតៅ។

ក្លិបបិសាចក្រហមបាននិយាយថា Lisandro Martinez នឹងត្រូវអវត្តមានយ៉ាងហោចណាស់ ៨សប្តាហ៍ ឬ អាចធូរស្បើយឆាប់បំផុតនៅអំឡុងខែមេសា។

ដោយឡែក បច្ចុប្បន្ន ក្រុម Man UTD កំពុងឈរលេខ៦ក្នុងតារាងពិន្ទុក្របខណ្ឌ Premier League ដោយមាន៣៨ពិន្ទុ ក្រោយឆ្លងកាត់ ២៣ប្រកួតរួចមក។ ការប្រកួតជាបន្ត Man UTD នឹងត្រូវធ្វើដំណើរទៅជួបក្រុម Aston Villa នាកីឡដ្ឋាន Villa Park ចុងសប្តាហ៍នេះ៕

អត្ថបទទាក់ទង