មហាសេដ្ឋីអង់គ្លេសលោក Jim Ratcliffe ទទួលបានការអនុម័តពី FA ក្នុងការទិញភាគហ៊ុនក្លិប Man UTD

Premier League
February 15th, 2024 (11 months)
405 Views
Share

ការទិញយករបស់មហាសេដ្ឋីអង់គ្លេសលោក Jim Ratcliffe លើភាគហ៊ុន ២៥ភាគរយក្លិប Manchester United ត្រូវបានទទួលការអនុម័តដោយសមាគមបាល់ទាត់អង់គ្លេស FA ហើយ។

ការអនុម័តរបស់ FA នេះ កើតឡើង មួយថ្ងៃបន្ទាប់ពីស្ថាប័ន Premier League បានផ្តល់សច្ចាប័នលើកិច្ចព្រមព្រៀង បន្ទាប់ពីបុរស វ័យ ៧១ ឆ្នាំបានឆ្លងកាត់ការធ្វើតេស្តអំពីភាពជាម្ចាស់ភាគហ៊ុនរបស់ក្លិបបិសាចក្រហម។

លោក Ratcliffe បានឈានដល់កិច្ចព្រមព្រៀងតម្លៃ ១,២៥ ពាន់លានដុល្លារ កាលពីខែធ្នូសម្រាប់ភាគហ៊ុន នឹងវិនិយោគ ៣០០ លានដុល្លារ ក្នុងការកែលម្អហេដ្ឋារចនាសម្ព័ន្ធ របស់ក្លិប Man UTD ផងដែរ។

កិច្ចព្រមព្រៀងនេះ នឹងឃើញលោក Ratcliffe ដែលជាអ្នកគាំទ្រ Man UTD យ៉ាងងុបងល់នោះទទួលបន្ទុកប្រតិបត្តិការបាល់ទាត់របស់ក្លិប ដោយផ្តោតលើការធ្វើអោយប្រសើរឡើងនូវកីឡដ្ឋាន Old Trafford និងពង្រឹងទម្រង់លេងរបស់ក្រុម។

ការទិញភាគហ៊ុនរបស់លោក Ratcliffe បានបញ្ចប់ភាពមិនច្បាស់លាស់ជាងមួយឆ្នាំ បន្ទាប់ពីម្ចាស់ភាគហ៊ុនធំ គ្រួសារ Glazer បាននិយាយនៅក្នុងខែវិច្ឆិកា ឆ្នាំ ២០២២ ថា ពួកគេកំពុងសម្លឹងមើលការវិនិយោគពីដៃគូនានាសម្រាប់ក្លិប Man UTD។

គ្រួសារសេដ្ឋីអាមេរិក Glazers បានទទួលរងនូវការរិះគន់យ៉ាងខ្លាំងពីអ្នកគាំទ្រ ចំពោះការធ្លាក់ចុះជាលំដាប់នៃក្លិបជើងឯកលីគកំពូលអង់គ្លេស២០សម័យ បន្ទាប់ពីគ្រូបង្វឹក លោក Alex Ferguson បានចូលនិវត្តន៍ក្នុងឆ្នាំ ២០១៣។

ការចូលរួមរបស់លោក Jim Ratcliffe បានទទួលការស្វាគមន៍យ៉ាងខ្លាំងពីក្រុមអ្នកគាំទ្រ Man UTD ដោយមានក្តីរំពឹងថា រូបលោក ពិតជាអាចស្រោចស្រង់ក្លិបរហស្សនាមបិសាចក្រហមឱ្យត្រឡប់ទៅកាន់ភាពខ្លាំងរបស់ខ្លួនដូចកាលពីពេលមុនវិញបាន៕

ការផ្សាយបន្តផ្ទាល់សម្រាប់ការប្រកួត Premier League នៅសប្តាហ៍ទី២៥ ចុងសប្ដាហ៍នេះ៖
Brentford vs Liverpool សៅរ៍ ១៧ កុម្ភៈ ម៉ោង ០៧:២៥ នាទីយប់ នៅ CNC
Spurs vs Wolves សៅរ៍ ១៧ កុម្ភៈ ម៉ោង ៩:៥៥ នាទីយប់ នៅ CNC
Man City vs Chelsea អាទិត្យ ១៨ កុម្ភៈ ម៉ោង ០០:២៥ នាទីរំលងអាធ្រាត្រ នៅ CTN

អត្ថបទទាក់ទង