គ្រូ Man UTD ទាមទារឱ្យ Fulham សូមទោស Bruno Fernandes ក្រោយបង្ហោះវីដេអូដៀមដាម

Premier League
March 1st, 2024 (1 year)
553 Views
Share

គ្រូបង្វឹក Manchester United លោក Erik ten Hag បានទាមទារឱ្យក្លិប Fulham ធ្វើការសូមទោស បន្ទាប់ពីពួកគេបានបង្ហោះវីដេអូដៀមដាម លេងសើចទៅលើ ខ្សែបម្រើ Bruno Fernandes ក្រោយ Fulham ទទួលបានជ័យជម្នះដោយលទ្ធផល ២-១ នៅកីឡដ្ឋាន Old Trafford កាលពីពេលកន្លងទៅ។

នៅក្នុងវីដេអូដែលបង្ហោះដោយ Fulham កីឡាករ Fernandes ហាក់មានអាការរបួសជើងនៅពេលស៊ុតបាល់នៅក្រៅប្រអប់ និងទំនងប៉ះទង្គិចជាមួយ Sasa Lukic ប៉ុន្ដែគេបានងើបឡើងដើរដោយគ្មានបញ្ហាអ្វីនោះទេ ហើយមានការសន្និដ្ឋានថា គេគ្រាន់តែធ្វើពុតជាឈឺប៉ុណ្ណោះ។

ក្លិបបិសាចក្រហម Man UTD បានចេញសេចក្ដីថ្លែងការណ៍មួយ សម្រាប់វីដេអូលេងសើចរបស់ Fulham ហើយលោក Ten Hag បានបង្ហាញអារម្មណ៍ខឹងសម្បារ ចំពោះសកម្មភាពរបស់ Fulham ។

ថ្លែងប្រាប់អ្នកសារព័ត៌មាន លោក Ten Hag បាននិយាយថា៖ “ខ្ញុំមិនដឹងពីរឿងនេះទេ ប៉ុន្ដែប្រសិនបើពួកគេបានធ្វើ ខ្ញុំអាចនិយាយថា វាមិនត្រឹមត្រូវឡើយ។ វាពិតជាមិនត្រឹមត្រូវនោះទេ ដែលក្លិបមួយធ្វើរឿងបែបនេះ ព្រោះវាពិតជាលើស និងខុសឆ្គង ហើយពួកគេគួរតែសូមទោសសម្រាប់រឿងនេះ។”

សូមបញ្ជាក់ថា Man UTD បច្ចុប្បន្នកំពុងឈរលេខ៦ក្នុងតារាងពិន្ទុក្របខណ្ឌ Premier League មាន ៤៤ពិន្ទុ ខណៈ Fulham ឈរលេខ១២ មាន៣២ពិន្ទុ៕

អត្ថបទទាក់ទង