គ្រូបង្វឹក Tottenham Hotspur ថា នឹងបដិសេធរាល់សំណើពីក្លិបនានា រួមទាំង Liverpool

Premier League
March 6th, 2024 (1 year)
976 Views
Share

គ្រូបង្វឹក Tottenham Hotspur លោក Ange Postecoglou ត្រូវបានគេរាយការណ៍មកថា បានត្រៀមខ្លួនរួចជាស្រេចហើយ ដើម្បីបដិសេធរាល់សំណើការងារទាំងអស់ នៅក្នុងរដូវក្តៅខាងមុខនេះ រួមទាំងពីក្រុម Liverpool ផងដែរ។

បុរសវ័យ ៥៨ឆ្នាំ បានសម្រេចចិត្តផ្ទេរពីក្លិប Celtic ដើម្បីមកដឹកនាំក្រុម Tottenham Hotspur នៅលីគកំពលអង់គ្លេសវិញ កាលពីដើមរដូវកាលនេះ ដោយសង្ឃឹមថាអាចនឹងជួយស្រោចស្រង់ក្រុមរហស្សនាមមាន់ខ្នាយមាសឡើងវិញ បន្ទាប់ពីពួកគេបានខកខានក្នុងការចូលរួមប្រកួតពានរង្វាន់អឺរ៉ុបកាលពីរដូវកាលមុន។

ក្រោមការដឹកនាំរបស់លោក Postecoglou ក្រុម Tottenham Hotspur ហាក់មានភាពល្អប្រសើរនៅរដូវកាលនេះ ដោយបច្ចុប្បន្នកំពុងឈរនៅលេខ៥ ក្នុងតារាងពិន្ទុក្របខណ្ឌ Premier League ដោយមាន ៥០ ពិន្ទុតាមពីក្រោយក្រុមលេខ៤ Aston Villa ចំនួន៥ពិន្ទុ។

ឥឡូវនេះ មានការរាយការណ៍អោយដឹងថា លោក Postecoglou គ្រោងនឹងបដិសេធរាល់ការផ្តល់ជូនណាមួយ ដែលចង់បានលោកទៅកាន់តំណែងជាគ្រូបង្វឹក បន្ទាប់ពីមានភាពរីករាយជាមួយក្លិប នៅក្នុងរដ្ឋធានីប្រទេសអង់គ្លេសមួយនេះ។

មិនតែប៉ុណ្ណោះ អតីតគ្រូបង្វឹកក្រុម Celtic រូបនេះ គ្មានចេតនាចាកចេញ ទៅធ្វើជាគ្រូបង្វឹកនៅក្រុមផ្សេងទៀតនោះឡើយនៅរដូវក្តៅខាងមុខនេះ បើទោះបីជាក្រុម Liverpool ហាក់បង្ហាញចំណាប់អារម្មណ៍ខ្លាំងលើលោក ដើម្បីទៅជំនួសតំណែងរបស់លោក Jurgen Klopp ដែលនឹងត្រូវចាកចេញនៅរដូវកាលក្រោយក្តី៕

អត្ថបទទាក់ទង