Nottingham Forest ក្លាយជាក្រុមទី២ នៅ Premier League ដែលត្រូវបានកាត់ពិន្ទុ ករណីបំពានច្បាប់ប្រាក់ចំណេញ PSR

Premier League
March 19th, 2024 (10 months)
422 Views
Share

Nottingham Forest ត្រូវបានស្ថាប័ន Premier League កាត់៤ពិន្ទុចេញ បន្ទាប់ពីរកឃើញថា ពួកគេបានបំពានច្បាប់នៃប្រាក់ចំណេញនិងនិរន្តរភាព PSR។

ជាការពិត គណៈកម្មការឯករាជ្យនៅអង់គ្លេស បានរកឃើញថា Nottingham Forest បានល្មើសច្បាប់ PSR នៅរដូវកាល ២០២២-២៣ ដោយរាយការណ៍ការខាតបង់ត្រឹមតែ ៣៤,៥ លានផោន ខណៈការខាតបង់មាន៦១លានផោន។

ដូច្នេះហើយ Premier League បានដាក់ទណ្ឌកម្មទៅលើក្រុម Nottingham Forest ដោយបានកាត់៤ពិន្ទុចេញហើយការកាត់ពិន្ទុនេះ បានធ្វើឱ្យក្រុម រអិលចុះទៅកាន់តំបន់កាត់ចោលលេខ១៨ មាន ២១ពិន្ទុ ឆ្លងកាត់២៩ប្រកួត ឃ្លាត១ពិន្ទុពីតំបន់សុវត្ថិភាព លេខ១៧ ដែលកំពុងឈរដោយក្រុម Luton Town ។

ជុំវិញរឿងនេះ ក្រុម Nottingham Forest បានចេញសេចក្តីថ្លែងការណ៍ថា ពួកគេមានការខកចិត្តចំពោះការសម្រេចចិត្តរបស់ Premier League ហើយករណីនេះបានបង្កជាក្តីបារម្ភសម្រាប់ក្លិបនានាផងដែរ។

ដោយឡែក ក្រុម Nottingham Forest នៅមានរយៈពេល៧ថ្ងៃ ក្នុងការដាក់ពាក្យប្តឹងឧទ្ធរណ៍ ដើម្បីប្រឆាំងនឹងការសម្រេចរបស់ស្ថាប័នលីគកំពូលអង់គ្លេសនេះ។

សម្រាប់ទណ្ឌកម្មនេះដែរ បានធ្វើឱ្យ Nottingham Forest ក្លាយជាក្រុមទី២ បន្ទាប់ពី Everton ដែលត្រូវបាន Premier League កាត់ពិន្ទុ ករណីបំពានច្បាប់ PSR ដូចគ្នា។ តួយ៉ាង Everton ត្រូវបានកាត់រហូតដល់ទៅ១០ពិន្ទុ កាលពីខែវិច្ឆិកា ប៉ុន្តែក្រោយមកក៏ត្រូវបន្ធូរបន្ថយទណ្ឌកម្ម មកត្រឹមការកាត់៦ពិន្ទុ ក្រោយពីពួកគេបានដាក់ពាក្យប្តឹងឧទ្ធរណ៍រួចមក៕

អត្ថបទទាក់ទង