គ្រូ Man UTD ថា ក្រុមគួរតែពង្រឹងទម្រង់លេងឡើងវិញ ក្រោយចាញ់ Crystal Palace ធ្ងន់ធ្ងរ

Premier League
May 8th, 2024 (11 months)
470 Views
Share

គ្រូបង្វឹក Manchester United លោក Erik Ten Hag បាននិយាយទៅកាន់សារព័ត៌មាន BBC របស់អង់គ្លេស កាលពីពេលថ្មីៗនេះថា ក្រុមបិសាចក្រហមរបស់លោកគួរតែពង្រឹងទម្រង់លេងឱ្យល្អឡើងវិញ។

ការលើកឡើងរបស់បុរសជនជាតិហូឡង់ គឺបន្ទាប់ពីក្រុម Man UTD បានបរាជ័យយ៉ាងធ្ងន់ធ្ងរ ក្រោមថ្វីជើងក្រុម Crystal Palace ក្នុងជំនួបក្របខណ្ឌ Premier League កាលពីពេលថ្មីៗនេះ តាមរយៈលទ្ធផល ៤-០។

ការបរាជ័យនោះ Man UTD បានចារប្រវត្តិសាស្ត្រមិនល្អថែមទៀត ដោយទទួលបរាជ័យក្នុងលីគច្រើនបំផុតចំនួន ១៣ ដងក្នុងមួយរដូវកាល។ ចំណែកគ្រាប់បាល់របូតវិញគឺ ៨១ គ្រាប់ដែលមិនធ្លាប់មានក្នុងប្រវត្តិសាស្ត្ររបស់ក្លិបបើរាប់តាំងពីឆ្នាំ ១៩៧៦-៧៧ មក។

ទោះជាលទ្ធផលបែបណាក៏ដោយលោក Ten Hag នៅតែមិនខ្វល់ថា អនាគតរបស់លោកនៅ Man UTD នឹងទៅជាយ៉ាងណាដោយលោកនៅតែនិយាយថានឹងខិតខំដឹកនាំអោយអស់ពីលទ្ធភាព ហើយក្រុមរបស់លោកត្រូវតែព្យាយាមពង្រឹងទម្រង់លេងឱ្យល្អវិញ។

គ្រូបង្វឹកវ័យ ៥៤ឆ្នាំ បាននិយាយដូច្នេះថា៖ “ក្នុងនាមជាក្លិប Man UTD យើងត្រូវតែពង្រឹងទម្រង់លេងឱ្យល្អឡើងវិញ។ កីឡាករដែលជាប់ជម្រើសចូលលេងក្នុងការប្រកួតទាំងអស់ គួរតែធ្វើយ៉ាងណាលេងអោយបានល្អ។ យើងសក្ដិសមនឹងចាញ់ណាស់។ ទម្រង់លេងរបស់យើង គឺមិនដូចអ្វីដែលយើងរំពឹងទុកទេ។”

ក្រោយចាញ់ការប្រកួតមួយនេះ Man UTD ធ្លាក់ទៅដល់លេខរៀងទី៨ នៅតារាង Premier League ដោយមាន ៥៤ពិន្ទុ។ ពួកគេអាចនឹងបាត់បង់ឱកាសចូលក្នុងការប្រកួតពានរង្វាន់របស់ UEFA នានៅរដូវកាលក្រោយ ដែលអាចជា ការខកខានការប្រកួតក្នុងពានរង្វាន់អឺរ៉ុបលើកដំបូង ចាប់តាំងពីរដូវកាល ១៩៨៩-៩០៕

អត្ថបទទាក់ទង