ខ្សែការពារ Virgil Van Dijk ថា ចង់បន្តលេងជាមួយ Liverpool ទោះលោក Jurgen Klopp ចាកចេញ

Premier League
May 8th, 2024 (9 months)
398 Views
Share

ខ្សែការពារ Virgil Van Dijk បង្ហាញក្តីរីករាយចំពោះការប្រកបអាជីពជាមួយក្លិប Liverpool ហើយថែមទាំងអះអាងថា ចង់បន្តដំណើរច្រើនឆ្នាំបន្តទៀត បើទោះលោក Jurgen Klopp នឹងចាកចេញពីតំណែងជាគ្រូបង្វឹក ក្រោយចប់រដូវកាលនេះក្តី។

កីឡាករហូឡង់ នឹងត្រូវផុតកំណត់កិច្ចសន្យា នៅចុងបញ្ចប់រដូវកាល២០២៤-២៥។ ថ្មីៗនេះមានការរាយការណ៍ថា Van Dijk សម្លឹងមើលការផ្លាស់ទៅលេងនៅក្លិបនៅអាល្លឺម៉ង់ ដូចជា Bayern Munich និង Dortmund ជាដើម។

តាំងពីលោក Klopp បានប្រកាសថានឹងចាកចេញពីក្លិប កាលពីខែកុម្ភៈ Van Dijk ក៏បាននិយាយពីអនាគតរបស់ខ្លួនថា កំពុងស្ថិតក្នុងភាពមិនច្បាស់លាស់។ យ៉ាងណា Van Dijk ហាក់បង្ហាញពីចំណាប់អារម្មណ៍ធ្វើការងារជាមួយគ្រូបង្វឹកថ្មី លោក Arne Slot ដែលបានចុះកិច្ចសន្យាជាមួយ Liverpool រួចស្រេច ដើម្បីជំនួសលោក Klopp។

កីឡាករវ័យ៣២ឆ្នាំ បាននិយាយថា៖ “យើងផ្តោតលើ ២ប្រកួតដែលនៅសល់ ទើបគិតគូលើគ្រូបង្វឹកថ្មី។ នេះនឹងក្លាយជាការផ្លាស់ប្តូរដ៏ធំ ពេលនេះគ្មានអ្វីដែលខ្ញុំត្រូវជជែកពីរឿងអនាគតនោះឡើយ។ ខ្ញុំកំពុងតែរីករាយខ្លាំងនៅទីនេះ ខ្ញុំស្រលាញ់ក្លិប វាគឺជាផ្នែកដ៏ធំមួយនៃជីវិតខ្ញុំ។”

ជាធម្មតាការផ្លាស់ប្តូរថ្នាក់ដឹកនាំ ក៏ដូចជាគ្រូបង្វឹក របស់ក្លិបនីមួយៗ នឹងធ្វើឱ្យមានការផ្លាស់ប្តូរយ៉ាងខ្លាំងទៅលើប្រព័ន្ធគ្រប់គ្រងក្លិប និងទម្រង់លេងរបស់ក្រុមទាំងមូល តែ Van Dijk អះអាងថា រូបគេនឹងមិនភ័យខ្លាចសម្រាប់ការផ្លាស់ប្តូរអ្វីឡើយ។

បច្ចុប្បន្ន Liverpool កំពុងតែស្ថិតនៅចំណាត់ថ្នាក់លេខ ៣ ដោយមាន ៧៨ពិន្ទុ ឈរពីក្រោមក្រុមលេខ ១ Arsenal មានគម្លាត ៥ពិន្ទុ និង ៤ពិន្ទុ ពីក្រុមលេខ ២ Manchester City។ ២ប្រកួតចុងក្រោយ Liverpool នឹងត្រូវជួបតទល់ក្រុម Aston Villa មុនពេលបើកទ្វារផ្ទះស្វាគមន៍ក្រុម Wolverhampton Wanderers។

ជំនួបក្នុងកីឡដ្ឋាន Anfield ក្នុងការប្រកួតទី៣៨ ជាមួយ Wolver នឹងក្លាយជាការប្រកួតចុងក្រោយដែលលោក Klopp បានដឹកនាំ អស់រយៈពេល ៩ឆ្នាំ ៕

អត្ថបទទាក់ទង