លោក Pep Guardiola បង្ហើបតម្រុយចាកចេញពីក្លិប Man City នៅឆ្នាំ ២០២៥

Premier League
May 21st, 2024 (5 months)
373 Views
Share

លោក Pep Guardiola បានបង្ហើបតម្រុយថា លោកអាចនឹងចាកចេញពីក្លិប Manchester City នៅក្នុងឆ្នាំ២០២៥ បន្ទាប់ពីរដូវកាលថ្មី ២០២៤-២៥ ខាងមុខ។

លោក Pep បានមកដឹកនាំ Man City តាំងពីឆ្នាំ២០១៦មក ដោយបានជួយក្លិបមានភាពលេចធ្លោ និងទទួលបានជោគជ័យ ឈ្នះពានរង្វាន់ជាច្រើន ជាពិសេសគឺឈ្នះពាន Premier League ៤រដូវកាលជាប់គ្នាចាប់ពីរដូវកាលឆ្នាំ២០២០-២១មក ប៉ុន្តែលោកឈ្នះពានសរុបទៅដល់ ៦ដងរហូតមកទល់នឹងពេល មិនតែប៉ុណ្ណោះ លោកក៏បានឈ្នះ UEFA Champions League កាលពីរដូវកាលមុន និងពានផ្សេងៗ។

កិច្ចសន្យារបស់លោក Pep Guardiola ជាមួយ Man City នឹងត្រូវផុតកំណត់នារដូវកាលក្រោយនោះ ប៉ុន្តែលោក បានបង្ហើបថា នឹងមិនច្បាស់លាស់ពីអនាគតនៅទឹកដី Etihad នោះឡើយ និងកោតសរសើរពីគំរូរបស់លោក Jurgen Klopp ដែលចាកចេញពីតំណែងនៅក្លិប Liverpool ទាំងមានមោនកភាព។

ទាក់ទិននឹងរឿងនេះ លោក Pep បាននិយាយថា៖ “ពិតណាស់ ការពិតនោះគឺថា ខ្ញុំជិតចាកចេញជាងបន្តនៅដឹកនាំក្លិបនេះក្នុងរយៈពេលវែង។ ខ្ញុំបាននិយាយគ្នាជាមួយខាងក្លិប Man City ហើយៗ យើងពិភាក្សាគ្នា ហើយអារម្មណ៍របស់ខ្ញុំគឺនឹងនៅដឹកនាំបន្តច្បាស់ណាស់ នឹងនៅបន្តដឹកនាំរដូវកាលថ្មីបន្តទៀត។”

លោកបន្តថា៖ “ប៉ុន្តែនៅរដូវកាលថ្មីនេះ យើងនឹងពិភាក្សាគ្នាបន្តបន្ទាប់ទៀត ខ្ញុំមិនច្បាស់ទេ ព្រោះខ្ញុំដឹកនាំក្លិបនេះ ៨ ឆ្នាំហើយ អ៊ីចឹងចាំមើលៗថាមានរឿងអីកើតឡើងបន្តទៀត។”

សូមបញ្ជាក់ថា ចាប់តាំងពីបានមកដឹកនាំ Man City មក លោក Pep Guardiola បានជួយក្លិបឈ្នះពានរង្វាន់ ដូចជា Premier League ៦ដង FA Cup ២ដង EFL Cup ៤ដង UEFA Champions League ១ដង UEFA Super Cup ១ដង និង FIFA Club World Cup ១ដងផងដែរ៕

អត្ថបទទាក់ទង