ក្លិប Leicester City ប្រឈមនឹងការកាត់ពិន្ទុ ក្រោយបានឡើងមកកាន់ក្របខណ្ឌ Premier League

Premier League
May 30th, 2024 (2 years)
995 Views
Share

ក្រោយឡើងមក Premier League ក្លិប Leicester City ប្រឈមនឹងការកាត់ពិន្ទុ ដោយសារតែបទល្មើសនឹងបទបញ្ញត្តិស្ដីពីប្រាក់ចំណេញ និងនិរន្តរភាព។ នេះបើតាមការចុះផ្សាយរបស់សារព័ត៌មាន The Telegraph។

ប្រភពខាងលើបានអោយដឹងថា ក្លិបជើងឯកលីគកំពូលអង់គ្លេសកាលពីឆ្នាំ២០១៦មួយនេះ ប្រឈមនឹងការកាត់ពិន្ទុប្រមាណពី ១០ ទៅ ១៥ពិន្ទុ។

Leicester City រងការចោទប្រកាន់ពាក់ព័ន្ធនឹងរឿងកាត់ពិន្ទុតាំងពីខែមីនាមកម្ល៉េះ តែក្រោយពីរដូវកាល ២០២៣-២៤ បានបញ្ចប់ ក្លិបមួយនេះបានឡើងមកលេងនៅ Premier League វិញ ក្រោយលើកពានលីគលំដាប់ទី២របស់អង់គ្លេស Championships។

បើតាមការចោទប្រកាន់ ខាងអាជ្ញាធរបាល់ទាត់អង់គ្លេសបានចោទ Leicester City ថា ក្លិបនេះបានចំណាយលើសពីការអនុញ្ញាតតាមការកំណត់របស់ច្បាប់ហិរញ្ញវត្ថុបាល់ទាត់ ក្នុងរយៈពេល ៣ឆ្នាំនៅ Premier League មុនពេលដែលក្លិបបានធ្លាក់ទៅលេងនៅលីគទី២។

អាជ្ញាធរបាល់ទាត់អង់គ្លេសបន្តចោទថា Leicester City មិនបានជូនរបាយការណ៍ហិរញ្ញវត្ថុ និងសវនកម្មមកកាន់ស្ថាប័នរបស់ខ្លួនឡើយ។

គិតត្រឹមខែឧសភា ឆ្នាំ២០២២ ក្លិប Leicester City មានការខាតបង់ក្បែរ ១១៩លានដុល្លារអាមេរិកក្នុងរយៈពេល ១២ខែ។ នៅក្នុងក្របខណ្ឌ Premier League ច្បាប់អនុញ្ញាតអោយក្លិបនីមួយៗខាតបង់ប្រមាណ ១៣០លានដុល្លារក្នុងរយៈពេល ៣ឆ្នាំ ឬ ខ្ទង់ ៤០លានដុល្លារក្នុងមួយឆ្នាំ។

បើតាមច្បាប់ខាងលើនេះ ខាងអាជ្ញាធរបាល់ទាត់អង់គ្លេសចង់ទប់ស្កាត់កុំអោយក្លិបនានាមានការចំណាយ លើសពីចំណូល ដែលជាការប៉ះពាល់ដល់និរន្តរភាពរបស់ក្លិប ក៏ដូចជាធ្វើយ៉ាងណាអោយក្លិបតូចៗអាចចូលរួមប្រកួតប្រជែងដោយយុត្តិធម៌ជាមួយក្លិបដែលមានធនធានខ្ពស់ៗផងដែរ៕

អត្ថបទទាក់ទង