Man City ត្រៀមប្តឹងបកទៅ Premier League វិញ ទាក់ទងបញ្ហាច្បាប់ហិរញ្ញវត្ថុ

Premier League
June 12th, 2024 (12 months)
535 Views
Share

សារព័ត៌មាន Express នៅអង់គ្លេសបានធ្វើការរាយការណ៍ថា ក្លិប Manchester City បានចាប់ផ្តើមស្វែងរកផ្លូវច្បាប់ ដើម្បប្តឹងតបទៅស្ថាប័ន Premier League វិញ ទាក់ទិនបញ្ហាច្បាប់ហិរញ្ញវត្ថុ មុនពេលសវនាលើការចោទប្រកាន់ ចំនួន១១៥ ករណីរបស់ពួកគេ។

Man City កំពុងព្យាយាមបញ្ចប់ច្បាប់ប្រតិបត្តិការភាគីពាក់ព័ន្ធរបស់ Premier League ដោយច្បាប់ទាំងនោះមានជាប់ទៅនឹងកិច្ចព្រមព្រៀងពាណិជ្ជកម្ម និង ការឧបត្ថម្ភជាមួយនឹងក្រុមហ៊ុន ដែលជាប់ពាក់ព័ន្ធទៅនឹងម្ចាស់ក្លិបដូចគ្នា។

ច្បាប់ទាំងនោះកំណត់ថា ប្រតិបត្តិការបែបនេះ ត្រូវតែបានវាយតម្លៃដោយឯករាជ្យ ដើម្បីអោយមានភាពយុត្តិធម៌ក្នុងតម្លៃទីផ្សារ ដោយច្បាប់នេះត្រូវបានបង្កើតឡើងក្នុងខែធ្នូឆ្នាំ២០២១។

យ៉ាងណា ជុំវិញច្បាប់បង្កើតថ្មីនេះ Man City ត្រូវបានចោទប្រកាន់ជាលើកដំបូងកាលពីខែកុម្ភៈ ឆ្នាំ២០២៣ ជាមួយនឹងការបំពានច្បាប់ហិរញ្ញវត្ថុ ជាង១០០ករណី ក្នុងរយៈពេល៩ឆ្នាំ ដែលចាប់ផ្តើមនៅឆ្នាំ២០០៩ និង បន្តរហូតដល់ឆ្នាំ២០១៨។

ការចោទប្រកាន់ទៅលើក្លិបមេឃខៀវ មិនបានបង្ហាញអោយបានពេញលេញនូវប្រាក់បំណាច់ហិរញ្ញវត្ថុ ដែលត្រូវបានធ្វើឡើងចំពោះគ្រូបង្វឹកម្នាក់ ក្នុងចំណោមគ្រូបង្វឹករបស់ពួកគេក្នុងរយៈពេល៤ឆ្នាំ។ ដូចនេះ អាចមានន័យថា មានកិច្ចសន្យាសម្ងាត់មួយដោយគ្រូបង្វឹកម្នាក់ទទួលបានប្រាក់ខែច្រើនជាងការបញ្ជាក់ជាផ្លូវការរបស់ក្លិប។

Premier League ក៏បានចោទប្រកាន់ថា Man City មិនបានគោរពតាមច្បាប់ស្តីពីហិរញ្ញវត្ថុរបស់ UEFA ក្នុងរយៈពេល៥ឆ្នាំ។ ពួកគេបានបន្តចោទប្រកាន់ Man City មិនបានសហការពេញលេញជាមួយការស៊ើបអង្កេត របស់ Premier League ដូចគ្នាដែរ។

សម្រាប់សវនាការលើការចោទប្រកាន់ចំនួន១១៥ ករណីរបស់ក្លិប Man City ត្រូវបានក្លិប បដិសេធទាំងអស់ ប៉ុន្តែលទ្ធផលកាត់ក្តីនឹងត្រូវដឹងនៅក្នុងខែវិច្ឆិកាខាងមុខ៕

អត្ថបទទាក់ទង