ខ្សែការពារ Aaron Wan-Bissaka ចាកចេញពី Man UTD មកចូលរួម West Ham United

Premier League
August 14th, 2024 (5 months)
330 Views
Share

ក្លិប West Ham United បានចុះហត្ថលេខានាំយកខ្សែការពារ Aaron Wan-Bissaka ពីក្លិប Manchester United ក្នុងកិច្ចសន្យារយៈពេល ៧ ឆ្នាំ។ នេះបើតាមការប្រកាសពីក្លិបដែលមានមូលដ្ឋាននៅទីក្រុងឡុងដ៍។

កិច្ចព្រមព្រៀងផ្ទេរនេះមានតម្លៃប្រហែល ១៥ លានផោន សម្រាប់កីឡាករវ័យ ២៦ ឆ្នាំដែលស្ថិតក្នុងឆ្នាំចុងក្រោយនៃកិច្ចសន្យារបស់គេជាមួយ Manchester United ។

Wan-Bissaka បានចាប់ផ្តើមអាជីពរបស់ខ្លួននៅក្លិប Crystal Palace មុនពេលចូលរួមជាមួយ Manchester United ក្នុងឆ្នាំ ២០១៩ ។ រូបគេបានលេង ១៩០ ប្រកួតសម្រាប់ក្លិប Manchester United និងបានរួមចំណែកឈ្នះពានរង្វាន់ FA Cup កាលពីរដូវកាលមុន។

ជុំវិញការចូលរួមជាមួយ ក្លិបថ្មី West Ham United នេះដែរ Wan-Bissaka បាននិយាយនៅក្នុងសេចក្តីថ្លែងការណ៍ថា “វាមិនមែនជារឿងពិបាកសម្រាប់ខ្ញុំក្នុងការចូលរួមជាមួយ West Ham ខ្ញុំរំភើប និងរីករាយដែលបាននៅទីនេះ។ ខ្ញុំស្ទើរតែមិនអាចរង់ចាំពេលវេលាបង្ហាញខ្លួនលើទីលានជាមួយក្លិបថ្មីរបស់ខ្ញុំនោះទេ។”

Aaron Wan-Bissaka បានមកចូលរួម Manchester United អំឡុងយុគសម័យនៃការដឹកនាំរបស់គ្រូបង្វឹកលោក Ole Gunnar Solskjaer ដោយរូបគេបានក្លាយជាកីឡាករជម្រើសដំបូងរហូតមក មុនពេល លោក Solskjaer ចាកចេញពីតំណែងនៅឆ្នាំ២០២១។ កីឡាករអង់គ្លេសរូបនេះ បានបាត់បង់នាទីលេងរបស់ខ្លួន ក្រោយការមកកាន់តំណែងរបស់គ្រូបង្វឹកលោក Erik ten Hag នៅឆ្នាំ២០២២។

ដោយឡែក ក្លិប West Ham United ដែលជាក្លិបថ្មីរបស់ Aaron Wan-Bissaka បានបញ្ចប់ក្នុងចំណាត់ថ្នាក់លេខ ៩ កាលពីរដូវកាលមុន។ ពួកគេនឹងចាប់ផ្តើមយុទ្ធនាការប្រកួតក្របខណ្ឌ Premier League រដូវកាលថ្មី ២០២៤-២៥ ដោយត្រូវស្វាគមន៍ Aston Villa នៅចុងសប្តាហ៍នេះដោយក្លិបក៏មានគ្រូបង្វឹកថ្មី លោក Julen Lopetegui ជាដឹកនាំការប្រកួត៕

អត្ថបទទាក់ទង