ទោះបានឈ្នះ Fulham តែ គ្រូ Man UTD មិនពេញចិត្តចំពោះទម្រង់លេងរបស់កូនក្រុម

Premier League
August 19th, 2024 (2 months)
304 Views
Share

គ្រូបង្វឹក លោក Erik ten Hag បានបង្ហាញការមិនពេញចិត្ត ចំពោះទម្រង់លេងរបស់កីឡាករ Man UTD បើទោះបីជាក្រុមបិសាចក្រហមរបស់លោក បានយកឈ្នះ ក្រុម Fulham ក្នុងជំនួបបើកឆាកក្របខណ្ឌ Premier League រដូវកាលថ្មី ២០២៤-២៥ កាលពីចុងសប្តាហ៍កន្លងទៅ ដោយថា កូនក្រុមបានធ្វើអោយរបូតឱកាស រកគ្រាប់បាល់ច្រើនលើក។

ជាការពិត ជ័យជំនះរបស់ Man UTD កើតឡើងនៅចុងម៉ោងទៅហើយ ពោលគឺនៅនាទី៨៧ ដែលជាការស៊ុតពីសំណាក់ខ្សែប្រយុទ្ធ Joshua Zerkzee ដែលទើបបង្ហាញខ្លួនដំបូង ក្រោយផ្ទេរមកពីក្រុមអ៊ីតាលី Bologna ។

យ៉ាងណា លទ្ធផលនេះ បានធ្វើអោយ ក្តីរំពឹងខ្ពស់របស់អ្នកគាំទ្រនាកីឡដ្ឋាន Old Trafford ហាក់បីជាថមថយបន្តិចទៅវិញ ក្រោយពីពួកគេបានឃើញការប្រកួតដំបូង រួមទាំងទម្រង់លេងរបស់ក្រុម Man UTD ធ្វើមិនសូវបានល្អក្នុងការបង្កើតឱកាសស្វែងរកគ្រាប់បាល់។

ជាមួយភាពមិនសូវល្អប្រសើរ ទោះជាដណ្តើមបាន៣ពិន្ទុ តែមិនទាន់ធ្វើអោយគ្រូបង្វឹក Man UTD លោក Ten Hag ពេញចិត្តឡើយ ព្រោះតែការបង្កើតឱកាសនៅមានចំណុចខ្វះខាត ។

ជុំវិញរឿងនេះ គ្រុបង្វឹកជនជាតិហូឡង់បានអោយដឹងថា “ខ្ញុំគិតថាផ្នែកមួយដែលយើងត្រូវកែតម្រូវឡើងវិញនោះ គឺរបៀបបញ្ចប់ទីនៅក្នុងប្រអប់គ្រោះថ្នាក់។ យើងបង្កើតបានឱកាសច្រើនគួរសម ហើយយើងមិនអាចរង់ចាំទាល់តែជិតចប់ការប្រកួត ដើម្បីយកឈ្នះនោះទេ យើងត្រូវតែមានសមត្ថភាព និងជាក្រុមដែលអាចផ្តួលរាល់ក្រុមដទៃ។”

បន្ថែមពីនេះ លោក Erik ten Hag ក៏បានដាស់តឿនកូនក្រុមអោយបញ្ចេញទម្រង់លេង អស់ពីសមត្ថភាព ចំពោះការប្រកួតនៅដើមរដូវកាល ព្រោះតែក្រុមកំពុងមានកីឡាករគុណភាពគ្រប់គ្រាន់ក្នុងការស៊ុតរកគ្រាប់បាល់។

បច្ចុប្បន្ន Man UTD កំពុងឈរនៅចំណាត់ថ្នាក់លេខ៧ក្នុងតារាងពិន្ទុ Premier League រដូវកាលថ្មី ២០២៤-២៥ មាន៣ពិន្ទុ។ ការប្រកួតជាបន្តគឺ Man UTD ត្រូវធ្វើដំណើរទៅជួប Brighton & Hove Albion នៅថ្ងៃទី២៤ ខែសីហា ខាងមុខ៕

អត្ថបទទាក់ទង