Arsenal ឈានដល់កិច្ចព្រមព្រៀងតម្លៃខ្លួនខ្សែបម្រើ Mikel Merino ពី Real Sociedad

Premier League
August 23rd, 2024 (2 months)
172 Views
Share

ក្លិប Arsenal បានយល់ព្រមលើតម្លៃខ្លួន ៣២,៦ លានផោន ដើម្បីចុះហត្ថលេខាលើខ្សែបម្រើ Mikel Merino ពីក្លិប Real Sociedad។ នេះបើយោងតាមរបាយការណ៍ប្រព័ន្ធផ្សព្វផ្សាយនៅអង់គ្លេស។

កីឡាករវ័យ ២៨ឆ្នាំ បានបង្ហាញខ្លួនអោយក្រុមជម្រើសជាតិអេស្ប៉ាញនៅរដូវក្តៅនេះ ខណៈដែលពួកគេបានឈ្នះពានរង្វាន់ជើងឯកទ្វីបអឺរ៉ុប UEFA Euro 2024 ដែលជាការឈ្នះជាលើកទី៤ក្នុងប្រវត្តិសាស្ត្រ ដោយរូបគេបានបង្ហាញក្នុងការប្រកួតទាំង ៧ របស់ក្រុមអេស្ប៉ាញ និងស៊ុតបញ្ចូលទីនៅនាទីចុងក្រោយក្នុងម៉ោងបន្ថែម ដើម្បីយកឈ្នះក្រុមម្ចាស់ផ្ទះអាល្លឺម៉ង់ក្នុងវគ្គ ៨ក្រុមចុងក្រោយ។

Mikel Merino បានចំណាយពេល ៦ រដូវកាលនៅ ក្លិប Real Sociedad បន្ទាប់ពីផ្ទេរចេញពីក្លិប Newcastle United ក្នុងឆ្នាំ ២០១៨ ដោយបានជួយ Real Sociedad មានលក្ខណៈសម្បត្តិគ្រប់គ្រាន់សម្រាប់ការប្រកួតពានរង្វាន់អឺរ៉ុបរយៈពេល ៤ឆ្នាំ ជាប់គ្នា ដែលជារយៈពេលវែងបំផុតក្នុងប្រវត្តិសាស្ត្រក្លិប។

Merino ត្រូវបានគេដឹងថា បានចាកចេញពី Real Sociedad កាលពីថ្ងៃអាទិត្យកន្លងទៅ នៅពេលដែលពួកគេបានចាញ់ ដោយលទ្ធផល ២-១ នៅទឹកដី Rayo Vallecano ហើយត្រូវបានគេរំពឹងថានឹងចុះហត្ថលេខាលើកិច្ចសន្យារយៈពេល ៤ ឆ្នាំនៅឯកីឡដ្ឋាន Emirates ។

Mikel Merino ក៏នឹងក្លាយទៅជាកីឡាករផ្ទេរចូលទី៣នៅរដូវក្តៅនេះ សម្រាប់ក្រុមរបស់លោក Mikel Arteta ដោយចូលរួមជាមួយមិត្តរួមជាតិ David Raya ដែល Arsenal បានចុះហត្ថលេខាលើអ្នកចាំទីវ័យ២៨ឆ្នាំ ជាអចិន្ត្រៃយ៍ពីក្លិប Brentford និងខ្សែការពារអ៊ីតាលី Riccardo Calafiori ផ្ទេរពីក្លិបអ៊ីតាលី Bologna៕

អត្ថបទទាក់ទង