Man UTD ឈានដល់កិច្ចព្រមព្រៀងតម្លៃផ្ទេរ ខ្សែបម្រើ Scott McTominay ទៅ Napoli

Premier League
August 26th, 2024 (2 months)
248 Views
Share

សារព័ត៌មាន BBC នៅអង់គ្លេសបានរាយការណ៍អោយដឹងថា ក្លិប Man UTD បានឈានដល់កិច្ចព្រមព្រៀង ក្នុងតម្លៃ ៣០លានអឺរ៉ូ ក្នុងការលក់ខ្សែបម្រើ Scott McTominay ទៅកាន់ក្លិបអ៊ីតាលី Napoli ។

ការចរចា រវាងក្លិបទាំង២ បានធ្វើឡើងដោយរលូន ប៉ុន្តែនៅក្នុងនោះ ក្លិប Napoli មិនទាន់ឈានដល់កិច្ចព្រមព្រៀងលក្ខខណ្ឌផ្ទាល់ខ្លួន ជាមួយកីឡាករ វ័យ២៧ឆ្នាំនៅឡើយទេ។ ទោះយ៉ាងណា សម្រាប់ក្លិបបិសាចក្រហម បានយល់ថា ខ្លួនបានទទួលជោគជ័យ ក្នុងការលក់កីឡាករ ដែលដុះដាលចេញពីថ្នាលយុវជនរបស់ក្លិប។

កាលពីដើមខែសីហា កន្លងទៅ Scott McTominay បានទទួលការចាប់អារម្មណ៍ ពីក្លិប Fulham នឹងបានដាក់សំណើទៅកាន់ក្លិប Man UTD តម្លៃ២០លានផោន តែត្រូវបានបដិសេធទៅវិញ។

រដូវកាលមុន កីឡាករស្កុតឡេន ក៏បានបដិសេធឱកាសផ្ទេរទៅចូលរួម West Ham ដោយបន្តលេងជាមួយ Man UTD ដោយគេបានបង្ហាញខ្លួន ៣២ដង ស៊ុតបាន ៧គ្រាប់ផងដែរ នៅក្នុងការប្រកួតក្របខណ្ឌ Premier League 2023-24។ រូបគេក៏បានបង្ហាញខ្លួនក្នុងការប្រកួត FA Cup ដែល Man UTD ឈ្នះ Man City ដើម្បីឈ្នះពានរង្វាន់នេះជាលើកទី ១៣ នៅក្នុងប្រវត្តិសាស្ត្ររបស់ក្លិប។

សម្រាប់រដូវកាលថ្មី ២០២៤-២៥ នេះវិញ Scott McTominay បង្ហាញខ្លួនត្រឹមជាកីឡាករបម្រុងរបស់ Man UTD ក្នុងការប្រកួត២សប្តាហ៍កន្លងមក។

ចំពោះគ្រូបង្វឹកលោក Erik ten Hag វិញ នៅតែចង់ពង្រឹង ក្រុមរបស់លោក តាមរយៈការនាំចូលកីឡាករថ្មី ហើយការបញ្ចេញ Scott McTominay នឹងធ្វើអោយការបត់បែន ផ្នែកហិរញ្ញវត្ថុ របស់ក្លិប Man UTD មានភាពរលូន។

របាយការណ៍ចុងក្រោយ បានរាយការណ៍ថា Man UTD ចង់នាំយក ខ្សែបម្រើ Manuel Ugarte ពី Paris Saint-Germain មកអោយខានតែបាន ប៉ុន្តែពួកគេមិនទាន់អាចឈានដល់កិច្ចព្រមព្រៀងជាមួយក្លិបបារាំងនោះទេ៕

អត្ថបទទាក់ទង