គ្រូ Man City ថា Erling Haaland អាចជាគូប្រជែង Cristiano Ronaldo និង Lionel Messi ក្លាយជាកីឡាករល្អបំផុតក្នុងប្រវត្តិសាស្ត្រ

Premier League
August 26th, 2024 (2 months)
217 Views
Share

គ្រូបង្វឹក Man City លោក Pep Guardiola បានបង្ហាញពីការពេញចិត្ត ចំពោះខ្សែប្រយុទ្ធ Erling Haaland និងថា រូបគេអាចក្លាយជាគ្រូប្រជែងខ្សែប្រយុទ្ធ Cristiano Ronaldo និង Lionel Messi ដើម្បីក្លាយជាកីឡាករល្អបំផុតនៅក្នុងប្រវត្តិសាស្ត្រ។

ជាការពិត Erling Haaland បន្តដើរតួជាកីឡាកររកគ្រាប់បាល់បញ្ចូលទីសម្រាប់ Man City ព្រមទាំងក្លាយជាកីឡាករធ្វើបាន Hat Trick ដំបូងគេនៅក្របខណ្ឌ Premier League រដូវកាលថ្មី ២០២៤-២៥ នៅក្នុងជ័យជំនះសប្តាហ៍ទី២ ដោយលទ្ធផល ៤ទល់នឹង១ លើក្រុមភ្ញៀវទើបឡើងមកថ្មី Ipswich Town កាលពីចុងសប្តាហ៍កន្លងទៅ។

គិតមកទល់ពេលនេះ Erling Haaland ធ្វើបាន Hat Trick ជាលើកទី១០ហើយ សម្រាប់អាជីពជាមួយ Man City។ កីឡាករន័រវែស វ័យ២៤ឆ្នាំរូបនេះ រកបាន១គ្រាប់ផងដែរ កាលពីជំនួបសប្តាហ៍ទី១ទល់នឹងក្រុម Chelsea ដែលធ្វើអោយគេស៊ុតបញ្ចូលទីបាន ៩៤គ្រាប់ហើយ នៅក្នុងការបង្ហាញខ្លួន ១០១ ប្រកួតជាមួយ Man City។ ក្រោយបញ្ចប់ការប្រកួតសប្តាហ៍ទី២ នៃក្របខណ្ឌ Premier League លោក Pep Guardiola បានលើកឡើងថា តាមរយៈចំនួនតួលេខនៃការប្រកួត និងគ្រាប់បាល់បញ្ចូលទីរបស់ Haaland គេគឺជាគូប្រជែងនឹង Cristiano Ronaldo និង Lionel Messi ដែលជាកីឡាករបាល់ទាត់ល្អបំផុតនៅក្នុងប្រវត្តិសាស្ត្រ។

លោក Pep Guardiola បានថ្លែងយ៉ាងដូច្នេះថា “តាមរយៈតួលេខទាំងនេះ ខ្ញុំកោតសរសើរគេមែនទែន។ Haaland អាចប្រជែងនៅក្នុងលក្ខខណ្ឌនៃការរកគ្រាប់បាល់ជាមួយនឹង Cristiano និង Messi ។ វាជារឿងមិនគួរអោយជឿនៅក្នុងវ័យរបស់គេ។ គេក្លាយជាកីឡាករដែលមានតម្រូវការខ្លាំងបំផុត តែខ្ញុំសង្ឃឹមថា គេអាចនៅទីនេះជាមួយយើងច្រើនឆ្នាំតទៅមុខទៀត។”

Erling Haaland បង្ហាញភាពលេចធ្លោពេលប្រកបអាជីពជាមួយក្លិបអូទ្រីស Red Bull Salzburg មុនពេលផ្លាស់ទៅចូលរួមជាមួយក្លិបអាល្លឺម៉ង់ Borussia Dortmund កាលពីឆ្នាំ ២០១៩ រួចបន្តផ្លាស់ទៅចូលរួមក្លិប Man City កាលពីឆ្នាំ២០២២ និងបង្កើនសមត្ថភាពកាន់តែខ្លាំងជាមុន រហូតក្លាយជាកីឡាករឈានមុខមួយរូបនៅលីគកំពូលអង់គ្លេស។

ដោយឡែក ការឈ្នះទាំង២ប្រកួតកន្លងមក Man City បានឈរកំពូលតារាងក្របខណ្ឌ Premier League រដូវកាលថ្មី ២០២៤-២៥ ដោយមាន៦ពិន្ទុ ស្មើពិន្ទុក្រុមលេខ២ Brighton ក្រុមលេខ៣ Arsenal និង ក្រុមលេខ៤ Liverpool៕

អត្ថបទទាក់ទង