គ្រូ Liverpool ថា ការប្តូរ Trent Alexander Arnold ក្នុងការប្រកួតទល់នឹង Brentford ព្រោះចង់អោយគេសម្រាក

Premier League
August 26th, 2024 (2 months)
252 Views
Share

ខ្សែការពារ Trent Alexander Arnold បានបង្ហាញភាពមិនសប្បាយចិត្ត ក្រោយរូបគេត្រូវបានប្តូរចេញ ក្នុងការប្រកួតដែល Liverpool ឈ្នះ Brentford ក្នុងជំនួបក្របខណ្ឌ Premier League 2024-25។

ជាការពិត ការប្រកួតដែលធ្វើឡើងនាទីលាន Anfield កាលពីយប់មិញ ខ្សែបម្រើ Luis Díaz ជាអ្នករកគ្រាប់បាល់នៅនាទី ១៣ ដើម្បីជួយ ក្រុមម្ចាស់ផ្ទះ Liverpool នាំមុខមុននៅក្នុងវគ្គទី១។

ចូលមកដល់វគ្គទី២ នាទី៧០ ខ្សែប្រយុទ្ធ Mohamed Salah បានទទួលបាល់ដែលបញ្ចូនមកពី Luis Díaz ដើម្បីស៊ុតបញ្ចូលទី១គ្រាប់ទៀត។ សម្រាប់ក្រុមភ្ញៀវ Brentford មិនអាចរកគ្រាប់បាល់បាននោះទេ។ ដោយលទ្ធផល Liverpool ២ Brentford ០ ក៏បន្តដល់ចប់ការប្រកួត។

យ៉ាងណា ក្នុងការប្រកួតនោះ កីឡាករ Trent Alexander Arnold បានប្ដូរចេញនៅនាទី៧២ ហើយរូបគេ បានសម្ដែងការមិនពេញចិត្តចំពោះការសម្រេចចិត្តរបស់ លោក Arne Slot ដែលជាគ្រូបង្វឹកថ្មីរបស់ Liverpool ។ យ៉ាងណា លោក Arne Slot បានដឹងដូចគ្នានូវរឿងដែល កីឡាករវ័យ២៥ឆ្នាំ មានការមិនពេញចិត្ត។ Trent Alexander Arnold មិនបានលេងពេញ៩០នាទីទេ២ប្រកួតកន្លងមកក្នុង ក្របខណ្ឌ Premier League 2024-25 កាលប៉ះ Ipswich Town ដែលឈ្នះ ២-០ នោះក៏គេត្រូវបានប្ដូរចេញនាទីទី៧៧ ខណៈការប្រកួតទល់នឹង Brentford រូបគេក៏ត្រូវបានប្ដូរចេញនាទីទី៧២ទៀត។

ក្រោយឃើញបែបនេះគ្រូបង្វឹកជនជាតិហូឡង់បាននិយាយថា “ខ្ញុំពិតជាយល់ កីឡាករគ្រប់គ្នាចង់លេងពេញ៩០នាទី។ ខ្ញុំមិនដែលគិតថាអ្នកអង្គុយនៅកៅអីបម្រុងសប្បាយចិត្តចំពោះការសម្រេចចិត្តរបស់ខ្ញុំទេ។ Alexander Arnold ទើបតែត្រឡប់ពីក្រុមជម្រើសជាតិអង់គ្លេស ហើយគេបានបំពេញតួនាទីច្រើនខ្លាំងណាស់ ដូច្នេះគេគួរតែសម្រាកខ្លះពេលមកដល់ក្រុមវិញ ។”

Liverpool បានឈ្នះ២ប្រកួតដំបូងបើកឆាកនៃ ក្របខណ្ឌ Premier League 2024-25 ដែលធ្វើអោយពួកគេមាន៦ពិន្ទុ ឈរនៅលេខ៤។ រីឯក្រុម Brentford នៅលេខ១៣មាន៣ពិន្ទុ។ ការប្រកួតជាបន្ត Liverpool ត្រូវប៉ះ Man UTD រីឯ Brentford ត្រូវប៉ះ Southampton នៅចុងសប្តាហ៍ខាងមុខ៕

អត្ថបទទាក់ទង