ខ្សែបម្រើ Scott McTominay ទៅធ្វើតេស្តសុខភាពត្រៀមចាកចេញពី Man UTD ទៅចូលរួម Napoli

Premier League
August 28th, 2024 (2 months)
136 Views
Share

ខ្សែបម្រើ Scott McTominay បានទៅធ្វើតេស្តសុខភាព ដើម្បីត្រៀមក្នុងការផ្លាស់ចេញពីក្លិបអង់គ្លេស Man UTD ទៅចូលរួមជាមួយក្លិបអ៊ីតាលី Napoli។

ក្លិបទាំង២បានយល់ព្រមទៅលើតម្លៃផ្ទេរ កីឡាករវ័យ២៧ឆ្នាំ ប្រមាណ ២៥,៤លានផោន ដោយ សាមីកីឡាករក៏យល់ព្រមចូលរួមជាមួយក្លិបនៅក្របខណ្ឌ Serie A ហើយ។ Napoli នឹងប្រកាសជាផ្លូវការអំពីការផ្ទេរចូល McTominay នាពេលឆាប់ៗ បើមិនមានការប្រែប្រួល។

កាលពីដើមខែសីហា កន្លងទៅ Scott McTominay បានទទួលការចាប់អារម្មណ៍ ពីក្លិប Fulham នឹងបានដាក់សំណើទៅកាន់ក្លិប Man UTD តម្លៃ២០លានផោន តែត្រូវបានបដិសេធទៅវិញ។ ការចាកចេញទៅចូលរួមជាមួយក្លិប Napoli នេះ គឺជាលើកទីមួយក្នុងអាជីពរបស់គេដែលលេងអោយក្លិបផ្សេងក្រៅពី Man UTD ។

Scott McTominay គឺជាកីឡាករដែលដុះចេញពីថ្នាលយុវជនរបស់ Man UTD ដោយបានមកលេងតាំងពីឆ្នាំ ២០០២ មក និងបន្តទៅលេងក្រុមឈុតធំចាប់ពីឆ្នាំ ២០១៧។ រូបគេបានលេងប្រមាណ ២៥៥ ប្រកួត និងស៊ុតចូល ២៩ គ្រាប់។ យ៉ាងណា រូបគេគឺជាកីឡាករដ៏ចម្រូងចម្រាស់មួយសម្រាប់អ្នកគាំទ្រ Man UTD ដោយ អ្នកគាំទ្រខ្លះពេញចិត្តនឹងទម្រង់លេងនិងចង់អោយក្លិបបន្តផ្ដល់ឱកាសអោយរូបគេ ខណៈអ្នកគាំទ្រខ្លះទៀត មិនសប្បាយចិត្តនឹងទម្រង់លេងរបស់គេ ជាពិសេសក្នុងប្រកួតសំខាន់ៗមួយចំនួន ហើយតែងតែទាមទារអំពាវនាវអោយក្លិបនាំចូលកីឡាករល្អៗនៅតំបន់ខ្សែបម្រើ ដើម្បីបង្កើនគុណភាពក្រុម។

សម្រាប់ការផ្ទេរ McTominay នេះដែរ គឺដើម្បីបើកផ្លូវក្នុងការនាំចូលខ្សែបម្រើ Manuel Ugarte ពីក្លិប Paris Saint Germain។ កីឡាករអ៊ុយរូហ្កាយ វ័យ២៣ឆ្នាំ អាចនឹងចូលរួម Man UTD នាពេលឆាប់ៗខាងមុខ ដោយក្លិបទាំង២ កាន់តែខិតជិតឈានដល់ព្រមព្រៀងហើយ៕

អត្ថបទទាក់ទង