ខ្សែការពារ Joao Cancelo ចាកចេញពី Man City ទៅចូលរួមក្លិប Al-Hilal

Premier League
August 28th, 2024 (2 months)
155 Views
Share

ខ្សែការពារ Joao Cancelo បានសម្រេចក្នុងការផ្លាស់ចេញពីក្លិបអង់គ្លេស Man City ទៅចូលរួមក្លិបអារ៉ាប៊ីសាអូឌីត Al-Hilal ហើយ ក្នុងតម្លៃ ២១,២ លានផោន។

កីឡាករព័រទុយហ្កាល់បានចូលរួមជាមួយក្លិបមេឃខៀវ ក្រោយផ្ទេរមកពីក្លិបអ៊ីតាលី Juventus កាលពីឆ្នាំ ២០១៩ តម្លៃ ៦០លានផោន និងបានក្លាយជាកីឡាករសំខាន់មួយរូបរបស់ក្រុមនាពេលកន្លងមក។

យ៉ាងណាមិញ ដោយសារការខ្វែងគំនិតគ្នារវាង កីឡាករវ័យ៣០ឆ្នាំ និង គ្រូបង្វឹក Man City លោក Pep Guardiola ទើបរូបគេត្រូវបានបញ្ចេញអោយទៅលេងជាកីឡាករខ្ចីជើងអោយក្លិបអាល្លឺម៉ង់ Bayern Munich កាលពីខែមករាឆ្នាំ២០២៣ រួចបន្តទៅលេងជាកីឡាករខ្ចីជើងអោយក្លិបអេស្ប៉ាញ Barcelona ទៀត។

កន្លងទៅ គ្រូបង្វឹក Man City លោក Pep Guardiola បាននិយាយថា លោកនឹងប្រើប្រាស់ Joao Cancelo នៅក្នុងគម្រោងរបស់លោកឡើងវិញ ប៉ុន្តែមែនទែនទៅ រូបគេ មិនទាន់បានបង្ហាញខ្លួនអោយក្រុមមេឃខៀវឡើយ។ តួយ៉ាង ការប្រកួតបើកឆាកក្របខណ្ឌ Premier League 2024-25 ២ប្រកួតដំបូងមិនមានឈ្មោះរបស់ Joao Cancelo នៅក្នុងក្រុមទេ។

Joao Cancelo ធ្លាប់ជាកីឡាករជម្រើសដំបូងរបស់លោក Pep Guardiola ប៉ុន្តែ រូបគេបានបាត់បង់កៅអីរបស់ខ្លួន ក្រោយពីចុះកិច្ចសន្យាថ្មីនៅក្នុងឆ្នាំ២០២២។

សូមបញ្ជាក់ថា Joao Cancelo បានមកចូលរួមជាមួយ Man City ក្រោយចាកចេញពី ក្លិបអ៊ីតាលី Juventus នៅក្នុងខែសីហា ឆ្នាំ២០១៩។ រូបគេបានបង្ហាញខ្លួនអោយ Man City ចំនួន ១៥៤ប្រកួត ស៊ុតបាន៩គ្រាប់ នៅគ្រប់កម្មវិធី និងបានរួមចំណែកឈ្នះពានរង្វាន់ Premier League ៣ដង FA Cup ១ដង និង EFL Cup ១ដង ផងដែរ៕

អត្ថបទទាក់ទង