Liverpool ទិញបានអ្នកចាំទី Giorgi Mamardashvili ពី Valencia

Premier League
August 28th, 2024 (2 months)
159 Views
Share

ក្លិប Liverpool នៅលីគកំពូលអង់គ្លេស បានយល់ព្រមចុះហត្ថលេខា នាំយកអ្នកចាំទី Giorgi Mamardashvili ពីក្លិប Valencia នៅលីគកំពូលអេស្ប៉ាញ ។

កីឡាករហ្សកហ្ស៊ី នឹងចូលរួមជាមួយក្លិបហង្សក្រហម ក្នុងតម្លៃផ្ទេរប្រមាណ ២៥លានផោន បូករួមថ្លៃចំណាយផ្សេងៗ ៤លានផោនទៀត។

យ៉ាងណាក៏ដោយ កីឡាករ Giorgi Mamardashvili នឹងបន្តលេងអោយក្លិប Valencia សម្រាប់ការប្រកួតក្របខណ្ឌ La Liga រដូវកាល ២០២៤-២៥ នេះសិន ទាល់តែរដូវកាល ២០២៥-២៦ ទើបរូបគេផ្លាស់ទៅលេងនៅទឹកដី Anfield ជាផ្លូវការ។

បច្ចុប្បន្ន កីឡាករប្រេស៊ីល Alisson Becker នៅតែជាអ្នកចាំទីជម្រើសទី ១ របស់ក្លិបហង្សក្រហម ខណៈដែលគ្រូបង្វឹកថ្មីលោក Arne Slot ក៏មានអ្នកចាំទីអៀរឡង់ Caoimhin Kelleher ជាអ្នកចាំទីដៃទី២ ផងដែរ។

Giorgi Mamardashvili បានលេងអោយក្រុមបាល់ទាត់ជម្រើសជាតិហ្សកហ្ស៊ី ៤ប្រកួតនៅព្រឹត្តិការណ៍ UEFA Euro 2024 មុនពេលពួកគេត្រូវបានទម្លាក់ដោយក្រុមជម្រើសជាតិអេស្ប៉ាញ នៅវគ្គ១៦ក្រុមចុងក្រោយ។

កីឡាករវ័យ២៩ឆ្នាំ រូបនេះ ក៏បានបង្ហាញខ្លួន ១០២ ប្រកួតសម្រាប់ក្លិប Valencia ចាប់តាំងពីមកចូលរួមក្នុងឆ្នាំ២០២១ ដោយផ្ទេរពីក្លិបនៅស្រុកកំណើត Dinamo Tbilisi។

សម្រាប់ Liverpool វិញ បើទោះជាបានទិញយក Mamardashvili មកមែន ប៉ុន្តែកីឡាកររូបនេះប្រហែលជា មិនមានកន្លែងលេងនោះទេ នៅរយៈពេល ១២ ទៅ ២៤ ខែទៀត ដ្បិត អ្នកចាំទី Alisson Becker នៅមានកិច្ចសន្យាជាមួយក្លិបចំនួន២ឆ្នាំ រួមទាំងជម្រើសបន្លាយថែម១ឆ្នាំ ទៀត ។

ដោយឡែក Alisson Becker ក៏ជាអ្នកជម្រុញ និង គាំទ្រ អោយ Liverpool ធ្វើការទិញយក Giorgi Mamardashvili មករួមក្លិបដែរ ដោយរូបគេយល់ថា កីឡាកររូបនេះនឹងជាកីឡាករមានសមត្ថភាពមួយរូបជួយដល់ក្លិបនាពេលអនាគត៕

អត្ថបទទាក់ទង