គ្រូ Man City ថា Erling Haaland ជាកីឡាករល្អប្លែកក្រោយស៊ុត Hat-Trick ឈ្នះ West Ham

Premier League
September 2nd, 2024 (1 month)
242 Views
Share

គ្រូបង្វឹក Man City លោក Pep Guardiola បាននិយាយថា ខ្សែប្រយុទ្ធ Erling Haaland ជាកីឡាករមានទេពកោសល្យល្អបែ្លក ក្រោយពីរូបគេបានស៊ុតបញ្ចូលទី ៣គ្រាប់ម្នាក់ឯង ដើម្បីជួយក្រុមមេឃខៀវយកឈ្នះ West Ham United ដោយលទ្ធផល ៣-១ នៅក្នុងជំនួបក្របខណ្ឌ Premier League កាលពីចុងសប្តាហ៍កន្លងទៅ។

ជាការពិត នេះជាលើកទី២ជាប់គ្នាហើយដែល Erling Haaland បន្តរកបានគ្រាប់បាល់ស៊ុតបញ្ចូលទី៣គ្រាប់ម្នាក់ឯង។ ការប្រកួតនាទីលាន London Stadium នោះ កីឡាករន័រវេសបានរកគ្រាប់បាល់នៅនាទី ១០ នាទី៣០ និង នាទី៨៣ ខណៈក្រុមម្ចាស់ផ្ទះ West Ham រកបានគ្រាប់បាល់ដោយបាល់ចូលទីខ្លួនឯងរបស់ Rúben Dias នៅនាទី១៩។

ឆ្លងកាត់ការប្រកួត៣លើកនៅលីគកំពូលអង់គ្លេស Haaland រកបានគ្រាប់ស៊ុតគ្រប់ការប្រកួត ក្នុងចំនួនសរុប ៧ គ្រាប់អោយក្រុមការពារជើងឯក Man City។ នេះជាការចាប់ផ្តើមរដូវកាលដ៏ល្អបំផុតរបស់ Haaland ក្នុងរដូវកាលទី៣របស់គេនៅទឹកដីអង់គ្លេស។

ការធ្វើបានល្អរបស់គេ សូម្បីលោក Pep Guardiola គ្រូបង្វឹក Man City ក៏មានភាពភ្ញាក់ផ្អើលចំពោះទេពកោសល្យដ៏អស្ចារ្យផងដែរ ដោយលោកបាននិយាយថា Erling Haaland ជាកីឡាករមានទេពកោសល្យល្អបែ្លកពីកីឡាករដទៃ។

លោក Pep Guardiola បានប្រាប់បែបនេះ “ខ្ញុំគ្មានពាក្យអ្វីនិយាយឡើយចំពោះ Haaland។ រដូវកាលថ្មីទើបតែដំណើរការ ប៉ុន្តែស្ថិតិចំនួនគ្រាប់បាល់របស់គេ ពិតជាមិនគួរអោយជឿ។ អ្វី គេលេងកាន់តែល្អ និងល្អជាងមុន ហើយ គេពិតជាកីឡាករ មានទេពកោសល្យល្អបែ្លក និង គួរអោយភ្ញាក់ផ្អើល។”

បន្តឈ្នះ៣ប្រកួតជាប់គ្នា Man City មាន៩ពិន្ទុពេញ និងឈរកំពូលតារាងពិន្ទុលីគកំពូលអង់គ្លេសរដូវកាល២០២៤-២៥នេះ។ រីឯ West Ham United មាន៣ពិន្ទុ ឈរលេខ១៣៕

អត្ថបទទាក់ទង