ខ្សែការពារ Jamal Lewis ផ្លាស់ចេញពី Newcastle United ទៅចូលរួម Sao Paulo ក្នុងនាមជាកីឡាករខ្ចីជើងដល់ចប់រដូវកាល

Premier League
September 4th, 2024 (1 month)
180 Views
Share

ខ្សែការពារ Jamal Lewis បានបំពេញការផ្លាស់ចេញពីក្លិបអង់គ្លេស Newcastle United ទៅចូលរួមក្លិបប្រេស៊ីល Sao Paulo ក្នុងនាមជាកីឡាករខ្ចីជើងរហូតដល់ចប់រដូវកាល។

កីឡាករវ័យ ២៦ឆ្នាំ បានក្លាយជាកីឡាករអៀរឡង់ខាងជើងទី១នៅក្នុងប្រវត្តិសាស្ត្រ ដែលទៅលេងអោយក្លិបដ៏ធំរបស់ប្រេស៊ីលមួយនេះ។

នៅក្នុងការផ្លាស់ទៅចូលរួម ក្លិប Sao Paulo នេះដែរ Jamal Lewis បានបង្ហាញពីភាពរីករាយរបស់ខ្លួន ដោយការសរសេរលើគេហទំព័ររបស់ក្លិបថា “ពេលដែលខ្ញុំទទួលបានឱកាសក្នុងការមកលេងជាមួយ Sao Paulo ខ្ញុំពិតជាមានភាពរីករាយណាស់។ នេះជាមោទនភាព និងជាកិត្តិយស សម្រាប់ខ្ញុំដែលបានមកលេងអោយក្លិបដ៏ធំបែបនេះ ហើយខ្ញុំនឹងព្យាយាមអោយអស់ពីសមត្ថភាពក្នុងការជួយក្លិបក្នុងការប្រជែងពានរង្វាន់នានា។”

Jamal Lewis មិនសូវមានឱកាសលេងទៀងទាត់ទេចាប់តាំងពីចូលរួមជាមួយ Newcastle United កាលពីឆ្នាំ ២០២០ ដោយផ្លាស់ពី Norwich ក្នុងតម្លៃ ១៥លានផោន និងចុះកិច្ចសន្យារយៈពេល៥ឆ្នាំ។ ជាក់ស្តែង រូបគេ បង្ហាញខ្លួនបានតែ៣៦ប្រកួតប៉ុណ្ណោះ អោយ Newcastle United ដោយការបង្ហាញខ្លួនចុងក្រោយគឺតាំងពីខែមករា ឆ្នាំ២០២៣។ រដូវកាល ២០២៣-២៤ កន្លងទៅ Jamal Lewis បានទៅលេងខ្ចីជើងអោយក្លិប Watford ជាទីដែលរូបគេបង្ហាញខ្លួនបាន៣៨ដងក្នុងការប្រកួតគ្រប់កម្មវិធី។

វិលត្រឡប់មកទឹកដី St James’ Park វិញ Jamal Lewis ក៏មិនត្រូវបាន គ្រូបង្វឹកលោក Eddie Howe ដាក់បញ្ចូលក្នុងសមាសភាពក្រុមរបស់លោកដែរ ក្នុងការប្រកួតក្របខណ្ឌ Premier League រដូវកាលថ្មី ២០២៤-២៥ នេះ មុនពេលរូបគេត្រូវបានប្រកាសពីការទៅចូលរួមជាមួយក្លិប Sao Paulo៕

អត្ថបទទាក់ទង