គ្រូ Chelsea ប្រាប់មូលហេតុនាំយក Jadon Sancho ពី Man UTD

Premier League
September 11th, 2024 (1 month)
289 Views
Share

គ្រូបង្វឹក Chelsea លោក Enzo Maresca បានបញ្ជាក់អំពីមូលហេតុដែលក្លិបតោខៀវផ្ទេរចូលខ្សែបម្រើ Jadon Sancho ដោយសាររូបគេមានសមត្ថភាព តាមអ្វីដែលក្លិបកំពុងត្រូវការ។

កាលពីបំណាច់ខែសីហាកន្លងទៅ Chelsea បានផ្ទេរចូល កីឡាករវ័យ២៤ឆ្នាំ ក្នុងនាមជាកីឡាករខ្ចីជើងពី Man UTD រយៈពេលមួយរដូវកាល ជាមួយនឹងជម្រើសទិញផ្តាច់នៅរដូវកាលក្រោយក្នុងតម្លៃប្រមាណ២៥លានផោន។

Jadon Sancho បានផ្លាស់ពីក្លិបអាល្លឺម៉ង់ Borussia Dortmund មកចូលរួមក្លិប Man UTD នៅឆ្នាំ ២០២១ ប៉ុន្តែរយៈពេលកន្លងមក រូបគេមិនទទួលបានជោគជ័យក្នុងការលេងនាកីឡដ្ឋាន Old Trafford នោះទេ។ អំឡុងរដូវកាល ២០២៣-២៤ រូបគេបានលេងអោយ Man UTD តែ៣ប្រកួតប៉ុណ្ណោះ មុនពេលត្រូវបានខ្ចីជើងទៅក្លិប Borussia Dortmund ។ ក្រោយចប់ការលេងខ្ចីជើងនៅ Dortmund កីឡាករអង់គ្លេសរូបនេះ បានត្រឡប់មកវិញ រូបគេមិនស្ថិតក្នុងជម្រើសរបស់គ្រូបង្វឹកលោក Erik ten Hag ដដែល។ ចុងក្រោយ Sancho បានសម្រេចមកលេងអោយ Chelsea។

ជុំវិញការនាំយក Jadon Sancho មករួមក្លិប Chelsea គ្រូបង្វឹកលោក Maresca បានប្រាប់ពីមូលហេតុនោះគឺកីឡាកររូបនេះ មានទេពកោសល្យសមស្របទៅនឹងអ្វីដែលក្លិបត្រូវការ។

បុរស វ័យ៤៤ឆ្នាំ បាននិយាយដូច្នេះថា “ ខ្ញុំសប្បាយចិត្តពេលទទួលដំណឹងថា Chelsea មានលទ្ធភាពផ្ទេរចូល Sancho។ រូបគេគឺជាកីឡាករដែលខ្ញុំចង់បាន ព្រោះគេពូកែញ្ញាក់បាល់ក្នុងស្ថានភាពមួយទល់នឹងមួយ។ Chelsea ត្រូវការកីឡាករប្រភេទនេះ ក្នុងស្ថានភាពបច្ចុប្បន្ន។”

ការផ្ទេរនេះ បិទបញ្ចប់ពេលវេលារបស់ Jadon Sancho ពី Man UTD ក្រោយរួមរស់ជាមួយគ្នាអស់ជាង ៣ ឆ្នាំ។ កាលពីដើមរដូវកាលមុន Sancho ក៏មានបញ្ហាពាក្យសម្ដីយ៉ាងធ្ងន់ធ្ងរ និងជាសាធារណៈជាមួយគ្រូបង្វឹកលោក Erik Ten Hag រហូតដល់ថ្នាក់កីឡាករអត់កន្លែងលេងក្នុងក្រុម ហើយត្រូវបានបញ្ជូនក្នុងនាមជាកីឡាករខ្ចីជើងនៅក្លឹបអាល្លឺម៉ង់ Borussia Dortmund។

បើទោះជា Ten Hag និយាយជារឿយៗហើយថា បញ្ហារវាងលោក និង Sancho ត្រូវបានសម្រួលគ្នាហើយ និងបន្ថែមទៀតថា Sancho គឺជាសមាជិកសំខាន់មួយរបស់ក្រុមរបស់លោក។ យ៉ាងនេះក្ដី បញ្ហានេះហាក់នៅបន្ត។ ចុងបញ្ចប់ Sancho នៅតែសម្រេចចាកចេញពីក្លឹប ហើយទៅចូលរួមជាមួយ Chelsea នៅទីក្រុងឡុងដ៍។

Sancho បានមកចូលរួមជាមួយ Manchester United កាលពីឆ្នាំ ២០២១។ មុនមកចូលរួមជាមួយតោខៀវ កីឡាកររូបនេះលេងសរុប ៨៣ ប្រកួត និងស៊ុតចូល ១២ ដង៕

អត្ថបទទាក់ទង