Man UTD ធ្លាប់ទាក់ទងលោក Thomas Tuchel ទៅដឹកនាំជំនួសលោក Erik ten Hag

Premier League
September 11th, 2024 (1 month)
245 Views
Share

មានការរាយការណ៍មកថា ក្លិប Man UTD ធ្លាប់បានធ្វើការទាក់ទងទៅកាន់លោក Thomas Tuchel ដើម្បីមកកាន់តំណែងជាគ្រូបង្វឹកជំនួសលោក Erik ten Hag។

Man UTD ធ្វើមិនសូវបានល្អឡើយ ក្នុងក្របខណ្ឌ Premier League 2024-25 ដោយយកឈ្នះបាន ១ដង ហើយចាញ់ចំនួន ២ដង ជាប់ៗគ្នា ក្នុងការប្រកួត៣លើកដំបូង។ ស្ថានការណ៍នេះនាំអោយកៅអីរបស់លោក Ten Hag ឡើងកម្តៅសាជាថ្មី។

មែនទែនទៅ Man UTD ធ្លាប់បានជួបជជែកជាមួយនឹងលោក Thomas Tuchel សម្រាប់តំណែងជាគ្រូបង្វឹក ដោយក្លិបចង់បណ្តេញលោក Ten Hag អំឡុងពេលត្រៀមរដូវកាលថ្មី។

កាលរដូវកាលមុន តំណែងរបស់លោក Ten Hag អាចរក្សាបាន ព្រោះតែបានដឹកនាំក្រុមឈ្នះពាន FA Cup យកឈ្នះលើ Man City ប៉ុន្តែនៅក្របខណ្ឌ Premier League វិញ ពួកគេបញ្ចប់ចំណាត់ថ្នាក់លេខ ៨ ដែលជាលទ្ធផលដ៏អាក្រក់ មិនធ្លាប់មានក្នុងប្រវត្តិសាស្ត្ររបស់ក្លិប។

បើទោះជា Man UTD បានទាក់ទងមែន ប៉ុន្តែលោក Tuchel មិនយល់ព្រមក្នុងការចរចានោះទេព្រោះមិនពេញចិត្តចំពោះគោលនយោបាយផ្ទេរកីឡាករដែលក្លិបបានស្នើឡើងមក។

បុរសជនជាតិអាល្លឺម៉ង់ វ័យ ៥១ឆ្នាំ មិនទាន់មានក្លិបដឹកនាំទេ ក្រោយចាកចេញពី ក្លិប Bayern Munich នៅដំណាច់រដូវកាលមុន ហើយរូបលោកត្រូវចាត់ទុកជាបុគ្គលមួយរូបដែលអាចកែប្រែស្ថានការណ៍របស់ Man UTD បាន។ ជាក់ស្តែង អំឡុងការដឹកនាំ Chelsea ត្រឹមតែរដូវកាលដំបូង លោក Tuchel បានជួយក្រុមប្រជែងឈ្នះពានរង្វាន់ UEFA Champions League និងពានរង្វាន់ក្នុងប្រទេសអង់គ្លេសមួយចំនួនផ្សេងទៀត មុនពេលក្លិបបានបណ្តេញលោកចេញពីតំណែង ហើយបន្តទៅដឹកនាំក្លិប Bayern Munich ក្នុងប្រទេសអាល្លឺម៉ង់។

ក្រៅពីការទាក់ទងលោក Thomas Tuchel ហើយ ក្លិប Man UTD ក៏ត្រូវបានរាយការណ៍ថាកំពុងតែទាក់ទងទៅអតីតគ្រូបង្វឹក Real Madrid លោក Zinedine Zidane ផងដែរ បន្ទាប់ពីក្លិបជួបបញ្ហាប្រឈមជាថ្មីក្នុងការប្រកួត៕

អត្ថបទទាក់ទង