ខ្សែការពារ Nathan Ake អាចអវត្តមានការប្រកួតរបស់ Man City ជាច្រើនខែដោយសាររបួស

Premier League
September 12th, 2024 (1 month)
196 Views
Share

ខ្សែការពារ Nathan Ake អាចនឹងអវត្តមានការប្រកួតរបស់ Man City ជាច្រើនខែដោយសារបញ្ហារបួស។

កីឡាករវ័យ២៩ឆ្នាំ បានរងរបួសភ្លៅខាងឆ្វេង នៅអំឡុងការប្រកួតពានរង្វាន់ UEFA Nations League ដែលក្រុមជម្រើសជាតិហូឡង់ទទួលបានលទ្ធផលស្មើគ្នា ២-២ ទល់នឹងក្រុមភ្ញៀវអាល្លឺម៉ង់។

Nathan Ake ត្រូវបានសែងចេញពីទីលានភ្លាមៗនៅអំឡុងការប្រកួតវគ្គទី១ ដោយរូបគេបានបង្ហាញពីអារម្មណ៏ឈឺចាប់យ៉ាងខ្លាំង។ ការពិត Ake បានព្យាយាមងើបឈរឡើងវិញក្រោយជួបញ្ហារបួសនេះ ប៉ុន្តែរូបគេធ្វើមិនបាន ដែលវាបានបញ្ជាក់ថារបួសគឺធ្ងន់ធ្ងរ ផ្អែកលើ ការបង្ហាញតាមកាយវិការរបស់សាមីកីឡាករ។

ទោះយ៉ាងណា គ្រូបង្វឹកក្រុមជម្រើសជាតិហូឡង់លោក Ronald Koeman យល់ថា របួសរបស់ Nathan Ake នោះអាចជារបួសសាច់ដុំភ្លៅ ប៉ុន្តែក៏រង់ចាំលទ្ធផលការត្រួតពិនិត្យពីក្រុមគ្រូពេទ្យផងដែរ។

ទោះយ៉ាងណា ប្រសិនបើរបួស មានភាពធ្ងន់ធ្ងរ នោះ Nathan Ake អាចនឹងអវត្តមានជាច្រើនខែ ដែលវានឹងធ្វើអោយមានផលប៉ះពាល់មួយចំណែកដ៏ធំនៅតំបន់ការពាររបស់ ក្រុម Man City ដែលនឹងមានការប្រកួតដ៏មមាញឹកក្រោយចប់ការសម្រាកអន្តរជាតិ។

ទន្ទឹមនឹងការព្រួយបារម្ភពីបញ្ហារបួសរបស់កីឡាករគ្រូបង្វឹក Man City លោក Pep Guardiola បានរំពឹងថា ស្ថានភាពរបស់ Nathan Ake នឹងមិនធ្ងន់ធ្ងរ ហើយរូបគេអាចនឹងមានភាពធូរស្រាល វិលត្រឡប់មកទីលានឆាប់ៗ។

គួរកត់សម្គាល់ថា Nathan Ake បានបង្ហាញខ្លួនចំនួន ៤៤ ដងសម្រាប់ Man City កាលពីរដូវកាលមុន ជាមួយភាពប៉ិនប្រសព្វ និងសមត្ថភាពលេង ធ្វើអោយអតីតកីឡាករ Bournemouth បានដើរតួនាទីសំខាន់សម្រាប់ការលេងជាមួយក្រុមជើងឯក Premier League ។

ដោយឡែក Man City ដែលបច្ចុប្បន្នកំពុងឈរកំពូលតារាងក្របខណ្ឌ Premier League 2024-25 ជាមួយ ៩ ពិន្ទុនៅក្នុងដៃ ក្រោយឆ្លងកាត់ការប្រកួត៣ប្រកួតមកនោះ នឹងចាប់ផ្តើមការប្រកួតលីគកំពូលអង់គ្លេសរបស់ពួកគេឡើងវិញ ដោយត្រូវបើកទ្វារកីឡដ្ឋាន Etihad ដើម្បីស្វាគមន៍ក្រុម Brentford នៅចុងសប្តាហ៍នេះ៕

អត្ថបទទាក់ទង