ខ្សែប្រយុទ្ធ Yoane Wissa របស់ Brentford ត្រូវអវត្តមានជាច្រើនខែព្រោះរបួសកជើង

Premier League
September 17th, 2024 (4 weeks)
132 Views
Share

ខ្សែប្រយុទ្ធ Yoane Wissa របស់ Brentford នឹងត្រូវអវត្តមានជាច្រើនខែបន្ទាប់ពីបានរបួសកជើង។ នេះបើតាមការលើកឡើងរបស់គ្រូបង្វឹក លោក Thomas Frank។

កីឡាករជនជាតិកុងហ្គោ បានទទួលរងរបួស នៅក្នុងការប្រកួតក្របខណ្ឌ Premier League សប្តាហ៍ទី ៤ ដែល Brentford ចាញ់ Manchester City ដោយលទ្ធផល ២-១។

ជាក់ស្តែង Yoane Wissa ត្រូវបានមើលឃើញថា មានអាការៈឈឺចាប់ ក្រោយការប៉ះទង្គិចជាមួយកីឡាករគូប្រជែង Mateo Kovacic នៅក្នុងវគ្គទី១ ហើយរូបគេក៏ត្រូវបានប្តូរចេញ។ កីឡាករវ័យ ២៨ឆ្នាំ ត្រូវបានរំពឹងថា អាចនឹងត្រលប់មកវិញនៅក្នុងអំឡុងខែវិច្ឆិកា។

ទាក់ទិននឹងរឿងនេះ លោក Thomas Frank បាននិយាយថា “វាមិនមែនជាដំណឹងល្អទេ សម្រាប់ Yoane Wissa ហើយវាមើលទៅដូចជារបួសដែលនឹងមានរយៈពេលពីរបីខែ។ ហើយខ្ញុំពិតជាខកចិត្តចំពោះបញ្ហានេះខ្លាំងណាស់។”

គ្រូបង្វឹកវ៧យ៥០ឆ្នាំបន្តថា “ យើងមានកីឡាករ ២ ៣ របួសរួចទៅហើយ ពេលនេះបន្ថែម Yoane Wissa ទៀត ដែលធ្វើអោយជួបប្រទះភាពស្មុគស្មាញ។ ប៉ុន្តែទាំងនេះជាផ្នែកមួយនៃបាល់ទាត់ វាត្រូវតែកើតឡើង ដូច្នេះអ្វីដែលយើងត្រូវធ្វើនៅពេលនេះគឺស្វែងរកដំណោះស្រាយសម្រាប់ក្រុមរបស់យើង។”

បន្ទាប់ពីការចាកចេញ របស់ខ្សែប្រយុទ្ធអង់គ្លេស Ivan Toney ទៅកាន់ក្លិប Al-Ahli នៅក្របខណ្ឌ Saudi Pro League រួចមក កីឡាករ Yoane Wissa បានបំពេញនូវចន្លោះខ្វះខាតរបស់ក្រុម Brentford និងបានដើរតួសំខាន់ក្នុងនាមជាកីឡាករស៊ុតគ្រាប់បាល់របស់ក្រុម។

Yoane Wissa បានស៊ុតចំនួន៣គ្រាប់ក្នុងការប្រកួតបើកឆាក ៤ប្រកួតនៅក្របខណ្ឌ Premier League របស់ Brentford ។ ទោះយ៉ាងណា របួសរបស់ Wissa ឥឡូវនេះបានក្លាយជាចន្លោះប្រហោងដ៏ធំរបស់ក្រុម ។

ឆ្លងកាត់ ៤ ប្រកួតក្នុងការជំនួបក្របខណ្ឌ Premier League រដូវកាលថ្មី ២០២៤-២៥ ក្រុម Brentford បានទទួលលទ្ធផលឈ្នះ ២ ចាញ់ ២ ដែលធ្វើអោយពួកគេមាន ៦ពិន្ទុ ឈរចំណាត់ថ្នាក់លេខ៩។ ការប្រកួតជាបន្ត Brentford នឹងធ្វើដំណើរទៅជួប Tottenham Hotspur នៅចុងសប្តាហ៍នេះ៕

អត្ថបទទាក់ទង