គ្រូ Man UTD ថា Antony ត្រូវពង្រឹងសមត្ថភាពឡើងវិញ ទើបទទួលបានឱកាសលេង

Premier League
September 17th, 2024 (4 weeks)
205 Views
Share

លោក Erik ten Hag គ្រូបង្វឹករបស់ Manchester United បាននិយាយថា ខ្សែបម្រើស្លាប Antony ត្រូវតែពង្រឹងសមត្ថភាពរបស់ខ្លួនឡើងវិញ ទើបរូបគេទទួលបានសិទ្ធិ និង ឱកាស ដើម្បីលេងនៅលើទីលាន។

កីឡាករប្រេស៊ីលគឺជាកីឡាករថ្លៃបំផុតទី២ក្នុងប្រវត្តិសាស្ត្ររបស់ក្លិបបិសាចក្រហម បន្ទាប់ពីខ្សែបម្រើ Paul Pogba ដោយការផ្ទេរចូលរបស់គេពីក្លិប Ajax ក្នុងឆ្នាំ ២០២២ មានតម្លៃដល់ទៅ៨២លានផោនឯណោះ។ បែបនេះក្តី Antony បានស៊ុតបញ្ចូលទីបានត្រឹមតែ ៥ គ្រាប់ និង ចែកបាល់សម្រេចទី៣ ដងប៉ុណ្ណោះក្នុងការបង្ហាញខ្លួន ៥៥ ប្រកួតអោយ Manchester United នៅក្នុងជំនួបក្របខណ្ឌ Premier League ហើយកាលពីរដូវកាលមុន រូបគេបានរួមចំណែកស៊ុត១ គ្រាប់និង ចែកបាល់សម្រេចទី១ដង ខណៈដែល Manchester United បានបញ្ចប់រដូវកាលក្នុងចំណាត់ថ្នាក់លេខ ៨ ។

សម្រាប់ការប្រកួតក្របខណ្ឌ Premier League រដូវកាលនេះវិញ កីឡាករវ័យ២៤ឆ្នាំ មានសកម្មភាពប្រកួតប្រជែងត្រឹមតែ១នាទីប៉ុណ្ណោះ នៅក្នុងការប្រកួតចាញ់ក្រុម Brighton ២-១កាលពីខែមុន ខណៈដែល Marcus Rashford, Alejandro Garnacho និង Amad Diallo ត្រូវបានជ្រើសរើសជាជម្រើសចម្បង។

យ៉ាងណា Antony សង្ឃឹមថានឹងមាននាទីលេងច្រើនជាងនេះ នៅក្នុងការប្រកួត ពានរង្វាន់ EFL Cup ជុំទី ៣ ទល់នឹងក្រុមលីគទី២ Barnsley ប៉ុន្តែ គ្រូបង្វឹក Manchester United លោក Ten Hag និយាយថា សាមីកីឡាករផ្ទាល់គឺជាអ្នកទទួលខុសត្រូវលើតួនាទីនិងឱកាសលេង និងថា រូបគេត្រូវតែពង្រឹងសមត្ថភាពឡើងវិញ បើចង់ទទួលបានវា។

គ្រូបង្វឹកជនជាតិហូឡង់បាននិយាយដូច្នេះ “Antony មានការអត់ធ្មត់ហើយគេចង់លេងណាស់ប៉ុន្តែនៅក្នុងបាល់ទាត់មានច្បាប់។ អ្នកត្រូវជ្រើសរើសកីឡាករល្អដើម្បីមានលទ្ធភាពឈ្នះខ្ពស់ដូច្នេះកីឡាករត្រូវតែតស៊ូដើម្បីតំណែងរបស់ពួកគេ ហើយ Antony ត្រូវឆ្លងកាត់រឿងនេះដែរ។”

ដោយឡែក Rashford, Garnacho និង Amad សុទ្ធតែបានស៊ុតបញ្ចូលទីរៀងខ្លួនហើយនៅរដូវកាលនេះ ដែលនេះបានបង្កើនសម្ពាធទៅលើ Antony ដែលត្រូវបានផ្សារភ្ជាប់ជាមួយនឹងក្លិបទួរគី Fenerbahce មុនពេលទីផ្សារដោះដូរកីឡាករបិទ៕

អត្ថបទទាក់ទង