Man UTD បង្កើនការចាប់អារម្មណ៍ ខ្សែបម្រើ Tyler Dibling របស់ Southampton

Premier League
September 23rd, 2024 (3 weeks)
126 Views
Share

Man UTD បានបង្កើនការចាប់អារម្មណ៍ទៅលើ ខ្សែបម្រើ Tyler Dibling របស់ Southampton។ នេះបើតាមការរាយការណ៍អោយដឹងពីសារពត៌មាន Express នៅអង់គ្លេស។

ជាការពិត ទោះជា Southampton បានចាញ់ Man UTD ដោយលទ្ធផល ៣-០ នៅក្នុងជំនួបក្របខណ្ឌ Premier League កាលពីពេលកន្លងទៅក្តី ប៉ុន្តែ កីឡាករ Tyler Dibling បានបង្ហាញសមត្ថភាពយ៉ាងលេចធ្លោក្នុងការជួយក្រុមរបស់ខ្លួន។

ទន្ទឹមនឹងនេះ ប្រភពដដែលបានអោយដឹងថា នាយកផ្នែកកីឡារបស់ Man UTD លោក Dan Ashworth បានក្លាយជាអ្នកគាំទ្រមួយរូបរបស់កីឡាករវ័យ១៨ឆ្នាំ ដោយលោកបានសរសើរពីគុណផលរបស់គេ ជាញឹកញាប់។

វាត្រូវបានគេជឿថា Man UTD អាចនឹងចរចាលើការផ្លាស់ប្តូរសម្រាប់ Tyler Dibling ទាំងនៅក្នុងទីផ្សារដោះដូរកីឡាករនាខែមករាឬរដូវក្តៅឆ្នាំក្រោយ ប៉ុន្តែ Southampton ត្រូវបានកំណត់ថានឹងប្រឹងប្រែងអោយអស់ពីលទ្ធភាព ដើម្បីរក្សាកីឡាករកំពុងមានសមត្ថភាពលេចធ្លោរបស់ខ្លួន ដោយនឹងត្រៀមផ្តល់កិច្ចសន្យាថ្មីអោយរូបគេលេងនៅទឹកដី St. Mary’s រយៈពេលវែង។ ដោយឡែក គ្រូបង្វឹក Southampton លោក Russell Martin ក៏ត្រៀមបង្កើនឱកាសរបស់គេក្នុងការបង្ហាញខ្លួនលើទីលាន ដើម្បីពង្រឹងសមត្ថភាពរបស់គេ និង ក្រុមអោយកាន់តែល្អជាងមុន។

Tyler Dibling បានដុះដាលចេញពីថ្នាលយុវជនរបស់ Southampton ហើយរូបគេត្រូវបានគេមើលឃើញថាជាអនាគតកីឡាករដែលមានសក្តានុពលដ៏ធំ ដោយបង្ហាញសមត្ថភាពនៅកម្រិតអន្តរជាតិហើយបានលេងអោយក្រុមយុវជនអង់គ្លេសគ្រប់ឈុតចាប់ពីឈុត U16 U17 U18 និង U19។

ទោះយ៉ាងណា មានការវិភាគជាច្រើនបានលើកឡើងថា Tyler Dibling គួរតែបន្តការលេងជាមួយ Southampton ជារឿងល្អ ព្រោះរូបគេអាចមានឱកាសច្រើនក្នុងការពង្រឹងសមត្ថភាព និង ការលេង ហើយក៏មានលទ្ធភាពខ្ពស់ក្នុងការជៀសវាងភាពតានតឹង មិនដូចការលេងជាមួយក្លិបដូចជា Man UTD ដែលកីឡាករជាច្រើនរូបបានរងសម្ពាធ និងការប្រកួតប្រជែងខ្ពស់ព្រោះការលេងជាមួយក្លិបធំៗបែបនេះ៕

អត្ថបទទាក់ទង