ខ្សែការពារ Ben Chilwell អាចបង្ហាញខ្លួនក្នុងការប្រកួត Chelsea នៅពានរង្វាន់ EFL Cup

Premier League
September 24th, 2024 (3 weeks)
157 Views
Share

ខ្សែការពារ Ben Chilwell ដែលត្រូវបានទុកចោលដោយគ្រូបង្វឹកលោក Enzo Maresca ចាប់តាំងពីលោកមកកាន់តំណែងនៅ Chelsea នោះ អាចនឹងមានឱកាសបង្ហាញខ្លួនជាលើកដំបូងនៅក្នុងការប្រកួតរដូវកាលនេះ នៅពេលដែលក្រុមតោខៀវត្រូវប្រកួតជាមួយក្រុមមកពីលីគទី៤ Barrow នៅក្នុងជុំទី៣ ពានរង្វាន់ EFL Cup។

កីឡាករអង់គ្លេស ត្រូវបាន Chelsea ដាក់លក់ក្នុងទីផ្សារដោះដូរកីឡាករកាលពីរដូវក្តៅកន្លងទៅ ប៉ុន្តែមិនត្រូវបានក្លិបណាមួយទិញយកនោះទេ។ ក្រោយមក Ben Chilwell បានត្រឡប់មកកាន់ទីលានហ្វឹកហាត់វិញ ក្រោយពីលោក Enzo Maresca បញ្ជាក់ថា ក្លិបនឹងរកដំណោះស្រាយចំពោះរូបគេ។

Ben Chilwell លែងមានកន្លែងលេងចាប់តាំងការមកដល់របស់កីឡាករអេស្ប៉ាញ Marc Cucurella នៅឆ្នាំ២០២២។ រដូវកាលកន្លងទៅ កីឡាករវ័យ២៧ឆ្នាំ ក៏ជួបប្រទះបញ្ហារបួសសរសៃពួរ និង របួសជង្គង់ថែមទៀត ដែលធ្វើអោយរូបគេ អាចបង្ហាញខ្លួន ត្រឹម២១ដង គ្រប់ការប្រកួត។ រីឯការប្រកួតរដូវកាល២០២៤នេះ រូបគេមិនទាន់បានបង្ហាញខ្លួននោះទេ ហើយរំពឹងថា អាចនឹងមានវត្តមានជាលើកដំបូងក្នុងការប្រកួត EFL Cup យប់នេះ។

ទាក់ទិននឹងរឿងនេះ លោក Enzo Maresca បានអោយដឹងថា “ មែនហើយ ខ្ញុំនឹងផ្តល់ឱកាសដល់ Ben Chilwell ។ រូបគេអាចនឹងបង្ហាញខ្លួនជាមួយក្រុម។ ខ្ញុំមិនទាន់ច្បាស់ទេ ថា ត្រូវដាក់រូបគេក្នុងជម្រើសដំបូង ឬ នៅកៅអីបម្រុង ប៉ុន្តែខ្ញុំពិតជាចង់ផ្តល់ឱកាសដល់រូបគេ។”

ក្នុងការប្រកួតពានរង្វាន់ EFL Cup កាលពីរដូវកាលមុន Chelsea ក្រោមការដឹកនាំរបស់អតីតគ្រូបង្វឹកលោក Mauricio Pochettino បានឡើងដល់វគ្គផ្តាច់ព្រ័ត្រ ទៅហើយ ប៉ុន្តែត្រូវចាញ់ក្រុម Liverpool នៅក្នុងម៉ោងបន្ថែម ដោយលទ្ធផល ១-០ ពីគ្រាប់បាល់របស់ Virgil van Dijk។ ចាប់តាំងពីមកកាន់តំណែងបន្តពីលោក Mauricio Pochettino លោក Enzo Maresca បានចាញ់តែ២ប្រកួតប៉ុណ្ណោះ ក្នុងចំណោម៧ប្រកួតនៅគ្រប់កម្មវិធី៕

អត្ថបទទាក់ទង