ម្ចាស់ក្លិប Everton យល់ព្រមលក់ភាគហ៊ុនធំទៅអោយម្ចាស់ក្លិប AS Roma

Premier League
September 24th, 2024 (3 weeks)
306 Views
Share

សាជីវកម្ម The Friedkin Group ដែលជាម្ចាស់ក្លិបអ៊ីតាលី AS Roma បានឈានដល់កិច្ចព្រមព្រៀងជាមួយក្រុមហ៊ុន Blue Heaven Holdings ជុំវិញលក្ខខណ្ឌនៃការទិញលក់ភាគហ៊ុនធំរបស់ម្ចាស់ក្លិប Everton លោក Farhad Moshiri។ នេះបើតាមការប្រកាសពីក្លិបនៅក្របខណ្ឌ Premier League ។

The Friedkin Group ធ្លាប់ចង់ទិញក្លិប Everton រួចម្តងហើយ កាលពីខែមិថុនា កន្លងទៅ ប៉ុន្តែក៏បានអាក់ខានទៅវិញ ក្រោយមិនអាចឈានដល់កិច្ចព្រមព្រៀងរួមគ្នា។ យ៉ាងណា ពេលនេះភាគីទាំងអស់ កំពុងស្ថិតក្នុងការពិភាក្សាផ្តាច់មុខដើម្បីទិញភាគហ៊ុនក្លិប Everton បន្ទាប់ពីកិច្ចព្រមព្រៀងទិញយកជាមួយក្រុមហ៊ុន 777 Partners បានធ្លាក់ចុះ។

សេចក្តីថ្លែងការណ៍របស់ក្លិបបានអោយដឹងថា កិច្ចព្រមព្រៀងនេះគឺ ស្ថិតនៅក្រោមការយល់ព្រមពីបទប្បញ្ញត្តិរួមរបស់ ស្ថាប័ន Premier League, សមាគមបាល់ទាត់អង់គ្លេស FA និងអាជ្ញាធរប្រតិបត្តិហិរញ្ញវត្ថុផងដែរ។

កាលពីឆ្នាំមុន ក្រុមហ៊ុន 777 Partners ដែលមានមូលដ្ឋាននៅទីក្រុង Miami បាននិយាយថា ខ្លួនបានចុះហត្ថលេខាលើកិច្ចព្រមព្រៀងជាមួយមហាសេដ្ឋីអង់គ្លេសកាត់អ៊ីរ៉ង់ លោក Farhad Moshiri ដើម្បីទទួលបានភាគហ៊ុន ៩៤,១ ភាគរយ នៅក្នុងក្លិប Everton នៅក្នុងកិច្ចព្រមព្រៀងដែលមានតម្លៃជាង ៥៥០ លានផោន ។ លោក Moshiri ដែលជាអតីតម្ចាស់ភាគហ៊ុនរបស់ក្លិប Arsenal ដំបូងបានទិញភាគហ៊ុន ៤៩,៩ ភាគរយនៅក្លិប Everton ក្នុងឆ្នាំ ២០១៦។ នៅខែមករាឆ្នាំ ២០២២ លោកបានបង្កើនភាគហ៊ុននៅក្លិប Everton ដល់ ៩៤,១ ភាគរយ។ សម្រាប់ការចរចាជាមួយ ក្រុមហ៊ុន 777 Partners ត្រូវបានរំពឹងថានឹងបិទនៅចុងឆ្នាំ ២០២៣ ប៉ុន្តែវាត្រូវបានពន្យារពេលព្រោះតែក្រុមហ៊ុន 777 Partners មិនអាចបំពេញតាមលក្ខខណ្ឌចង់បានពីស្ថាប័ន Premier League ។ បន្ថែមពីនេះ ក្រុមហ៊ុន 777 Partners ត្រូវបានមើលឃើញថា ប្រឈមនឹងការក្ស័យធន បន្ទាប់ពីមានបណ្តឹងជាបន្តបន្ទាប់ ការចោទប្រកាន់ពីការក្លែងបន្លំ និងការពន្យារពេលការបង់ប្រាក់កាលពីឆ្នាំមុន។

បញ្ហានេះនាំអោយមានការប៉ះពាល់ដល់ហរិញ្ញវត្ថុរបស់ក្លិប Everton។ ដូច្នេះហើយក្លិប Everton បានជួបប្រទះបញ្ហាធំ គឺប្រឈមនឹងការកាត់ទៅលីគក្រោម កាលពីរដូវកាលមុន បន្ទាប់ពីត្រូវបានកាត់ពិន្ទុ២ដងសម្រាប់ការបំពានច្បាប់នៃប្រាក់ចំណេញ និងនិរន្តរភាព PSR របស់ស្ថាប័ន Premier League ។ ទោះបែបនេះក្តី Everton បានតស៊ូរហូតអាចបញ្ចប់ក្នុងចំណាត់ថ្នាក់លេខ ១៥ ដើម្បីធានាបាននូវកៅអីនៅក្របខណ្ឌ Premier League ជាបន្តទៀត៕

អត្ថបទទាក់ទង