ខ្សែការពារ Trent Alexander Arnold របស់ Liverpool ក្លាយជាគោលដៅផ្ទេរពី Real Madrid

Premier League
September 26th, 2024 (3 weeks)
151 Views
Share

ខ្សែការពារ Trent Alexander Arnold របស់ក្លិបនៅលីគកំពូលអង់គ្លេស Liverpool កំពុងក្លាយជាគោលដៅចង់បាន ពីសំណាក់ក្លិបនៅលីគកំពូលអេស្ប៉ាញ Real Madrid។

កីឡាករអង់គ្លេស នឹងផុតកុងត្រានៅដំណាច់រដូវកាល ២០២៤-២៥ ហើយរូបគេនឹងមានលទ្ធភាពក្នុងការនិយាយជាមួយក្លិបនៅបរទេសចាប់ពីខែមករា។

មានការរំពឹងទុកជាបន្តបន្ទាប់អំពីការផ្លាស់ប្តូររបស់ Trent Alexander Arnold ទៅកាន់ប្រទេសអេស្ប៉ាញដើម្បីចូលរួមជាមួយ Real Madrid ប៉ុន្តែវានៅតែមានទំនុកចិត្តថា សាមីកីឡាករនឹងចុះហត្ថលេខាលើកិច្ចព្រមព្រៀងថ្មីជាមួយ Liverpool ។

ទន្ទឹមនឹងនេះ Trent Alexander Arnold បានអះអាងថា រូបគេនៅតែមានក្តីសុបិន្តក្នុងការក្លាយជាប្រធានក្រុមរបស់ Liverpool និងជួយក្រុមឈ្នះពានរង្វាន់ជាច្រើនទៀតនៅទីនេះ។

កីឡាករ វ័យ២៥ឆ្នាំ បានដុះដាលចេញពីថ្នាលយុវជនរបស់ Liverpool ជាច្រើនឆ្នាំមកហើយដោយក្នុងនោះ រូបគេបានបញ្ជាក់ប្រាប់ក្រុមអ្នកព័ត៌មានថា គេមានវត្តមាននៅទីនេះអស់រយៈពេល២០ឆ្នាំមកហើយ និងបានចុះកុងត្រា ៤ទៅ៥ដងមកហើយ ទោះបីជាមិនត្រូវបានប្រកាសជាសាធារណៈក្តី។

Trent Alexander Arnold បញ្ជាក់ទៀតថា រូបគេនៅ មានក្តីសុបិន្តដ៏មានសារៈសំខាន់ ផ្សេងទៀតនៅទីនេះគឺជាការលើកពានរង្វាន់និងក្លាយខ្លួនជាប្រធានក្រុមដ៏ជោគជ័យម្នាក់នៅ Liverpool។

យ៉ាងណាក្តី កីឡាករខ្សែការពារស្លាបស្តាំរូបនេះក៏មិនដែលបានបង្ហាញអំពីបំណងក្នុងការចាក ចេញពីក្លិបនោះទេ ទោះបីជាមានការទាក់ទង ពីក្លិបធំៗនៅអឺរ៉ុបផ្សេងទៀតបូករួមទាំង Real Madrid ផងដែរ។

Trent Alexander Arnold បានលេងអោយក្រុមឈុតធំ Liverpool តាំងពីឆ្នាំ ២០១៦មក ដោយមកទល់ពេលនេះ គេបានបង្ហាញខ្លួន ៣១៦ដង ស៊ុតបាន១៩គ្រាប់ និងរួមចំណែកជួយក្រុមហង្សក្រហមឈ្នះពាន Premier League ១ដង FA Cup ១ដង EFL Cup ១ដង UEFA Champions League ១ដង UEFA Super Cup ១ដង និង FIFA Club World Cup ១ដង៕

អត្ថបទទាក់ទង