ខ្សែការពារ Raphael Varane ប្រកាសចូលនិវត្តន៍ពីបាល់ទាត់

Premier League
September 26th, 2024 (2 weeks)
128 Views
Share

អតីតខ្សែការពារ Man UTD និង Real Madrid កីឡាករ Raphael Varane បានសម្រេចចិត្តចូលនិវត្តន៍ពីបាល់ទាត់ហើយក្នុងវ័យ៣១ឆ្នាំ។

កាលពីដើមរដូវកាល ២០២៤-២៥ កីឡាករបារាំង បានសម្រេចចាកចេញពីក្លិប Man UTD ទៅចូលរួមជាមួយក្លិប Como នៅលីគកំពូលអ៊ីតាលីក្នុងកុងត្រា១រដូវកាល។

គិតមកដល់ពេលនេះលីគកំពូលអ៊ីតាលីបានដំណើរប្រកួតដល់សប្ដាហ៍ទី៥ហើយ ប៉ុន្តែគេមិនទាន់ឃើញ Varane ចូលលេងអោយក្លិបថ្មីរបស់ខ្លួនទេដោយសារតែបញ្ហារបួសជង្គង់ ក្នុងការប្រកួតទល់នឹងក្រុម Sampdoria ក្នុងពានរង្វាន់ Coppa Italia កាលពីខែមុន។

រហូតមកដល់ពេលថ្មីៗនេះ អតីតខ្សែការពារជម្រើសជាតិបារាំងរូបនេះ បានប្រកាសចូលនិវត្តន៍ពីបាល់ទាត់។ ការជជែកស្ដីពីការបញ្ចប់កុងត្រាជាមួយ Como ខ្សែការពាររូបនេះបានធ្វើវារួចរាល់។ ទោះយ៉ាងណា Raphael Varane នឹងបន្តស្ថិតនៅជាមួយក្លិប Como តែមិនកាន់តួនាទីជាកីឡាករទៀតនោះទេ។

ជុំវិញរឿងចូលនិវត្តន៍នេះ Raphael Varane បានអោយដឹងថា “ ខ្ញុំបានជួបការបរាជ័យហើយប្រឹងប្រែងរហូតទទួលជោគជ័យវិញជាច្រើនដង។ ប៉ុន្តែនេះវាជាពេលវេលា ដែលខ្ញុំត្រូវឈប់ពីរឿងនេះ និងព្យួរស្បែកជើងរបស់ខ្ញុំហើយ។”

Raphael Varane ត្រូវបានចាត់ទុកជាកីឡាករបាល់ទាត់ជោគជ័យមួយរូប។ គេបានចាប់ផ្តើមអាជីពជាមួយក្លិបបារាំង Lens នៅក្នុងឆ្នាំ ២០១០ មុនទៅចូលរួម Real Madrid នៅឆ្នាំ ២០១១។ លេងជាមួយក្លិបអេស្ប៉ាញ ជាពេលវេលា នៃការឈានដល់ចំនុចខ្ពស់បំផុតក្នុងអាជីពរបស់ Raphael Varane ដោយនៅទឹកដី Santiago Bernabéu រូបគេបានបង្ហាញខ្លួន ៣៦០ដង ស៊ុតបញ្ចូលទីបាន ១៧គ្រាប់ និងបានរួមចំណែកឈ្នះពានរង្វាន់តូចធំនានាជាមួយក្លិបអធិរាជស ដូចជាពានរង្វាន់ La Liga ៣ដង Copa del Rey ១ដង Supercopa de España ៣ដង UEFA Champions League ៤ដង UEFA Super Cup ៣ដង និង FIFA Club World Cup ៤ដង។

Varane បានបន្តអាជីពមកចូលរួមជាមួយ Man UTD ក្នុងឆ្នាំ ២០២១ ដោយបានបង្ហាញខ្លួន ៩៥ដង ស៊ុតបាន២គ្រាប់និងបានឈ្នះពានរង្វាន់ FA Cup ១ដង និង EFL Cup ១ដង។ នៅចុងខែកក្កដា ឆ្នាំ២០២៤ Raphael Varane បានចាកចេញពី Man UTD មកចូលរួម Como ដោយចុះកុងត្រារយៈពេល២ឆ្នាំ អមដោយជម្រើសបន្លាយកិច្ចសន្យាបានទៀត។ យ៉ាងណាមិញ Raphael Varane បង្ហាញខ្លួនបានតែ១ដងប៉ុណ្ណោះជាមួយ Como និងអវត្តមានរហូតដោយសាររបួស មុនប្រកាសចូលនិវត្តន៍នៅពេលនេះ៕

អត្ថបទទាក់ទង