ខ្សែការពារ Harry Maguire ថានឹងត្រឡប់មកវិញដោយភាពខ្លាំងក្លាក្រោយធូរស្រាលរបួស

Premier League
October 10th, 2024 (1 year)
419 Views
Share

ខ្សែការពារ Manchester United កីឡាករ Harry Maguire បាននិយាយថា រូបគេនឹងត្រឡប់មកកាន់ទីលានវិញដោយភាពខ្លាំងក្លាជាងមុន ក្រោយពីរូបគេបានសម្រាកព្យាបាលរបួសអោយបានធូរស្រាល។

កីឡាករវ័យ៣១ឆ្នាំបានទទួលរងរបួស ក្នុងការប្រកួតក្របខណ្ឌ Premier League ដែល Manchester United ស្មើគ្នា ០-០ ទល់នឹងក្រុមម្ចាស់ផ្ទះ Aston Villa កាលពីចុងសប្តាហ៍កន្លងទៅ ។

Maguire ត្រូវបានប្តូរ ចេញ ពីទីលាន នៅនាទី៤៦នៃវគ្គទី២ មុនចាកចេញពីកីឡដ្ឋានកីឡដ្ឋាន Villa Park ដោយមានពាក់ឧបករណ៍ការពារជើង។

ក្រោយការពិនិត្យបង្ហាញថា Harry Maguire នឹងត្រូវសម្រាកព្យាបាលរបួសដោយប្រើពេលយ៉ាងហោចណាស់ ២ ទៅ ៣ សប្តាហ៍។

ពាក់ព័ន្ធនឹងការទទួលរងរបួសនេះ សាមីកីឡាករបានបង្ហាញពី ភាពខកចិត្ត ព្រោះតែវាបានបង្ហាក់រូបគេពីការបង្ហាញសមត្ថភាព ប៉ុន្តែ រូបគេក៏បានសន្យាថាខ្លួននឹងលេងដោយភាពខ្លាំងក្លាជាងមុន ក្រោយព្យាបាលរបួសរួចរាល់។

Harry Maguire បានបង្ហោះសារលើបណ្តាញសង្គម Instagram ថា “ ខ្ញុំមិនអស់ចិត្តទេ ដែលទទួលរងរបួសក្នុងការប្រកួតកាលពីចុងសប្តាហ៍មុន។ ខ្ញុំត្រូវសម្រាកជាច្រើនសប្តាហ៍មិនបានចូលទីលាន ប៉ុន្តែខ្ញុំនឹងអោយអ្នកគ្រប់គ្នា បានឃើញពីភាពខ្លាំងក្លារបស់ខ្ញុំ ពេលខ្ញុំចូលប្រកួតឡើងវិញ។”

ដោយសាររបួសនេះដែរ Harry Maguire មិនត្រូវបានបញ្ចូលឈ្មោះក្នុងក្រុមបាល់ទាត់ជម្រើសជាតិអង់គ្លេសសម្រាប់ការប្រកួត UEFA Nations League ដែលអង់គ្លេសត្រូវប៉ះក្រិច និង ហ្វាំងឡង់ នៅក្នុងខែតុលានេះ។

Harry Maguire ដែលបានខកខានព្រឹត្តិការណ៍ UEFA Euro 2024 ព្រោះតែរបួសកំភួនជើង បានបង្ហាញខ្លួន អោយ Manchester United ៩ប្រកួតនៅរដូវកាលនេះ និងបានចូលរួមចំណែករកគ្រាប់បាល់ក្នុងការប្រកួតស្មើគ្នា ៣-៣ ទល់នឹង Porto ក្នុងការប្រកួតពានរង្វាន់ UEFA Europa League ផងដែរ។

ដោយឡែក Manchester United បច្ចុប្បន្ន កំពុងឈរលេខ១៤នៃតារាងពិន្ទុ ក្របខណ្ឌ Premier League ដោយមាន៨ពិន្ទុ។ ការប្រកួត Premier League ជាបន្តគឺ Manchester United នឹងត្រូវស្វាគមន៍ Brentford នៅថ្ងៃទី១៩ ខែតុលា ខាងមុខ៕

អត្ថបទទាក់ទង