ខ្សែប្រយុទ្ធ Diogo Jota ទំនងអវត្តមានការប្រកួត Liverpool ទល់នឹង Arsenal ដោយសាររបួស

Premier League
October 25th, 2024 (2 years)
848 Views
Share

ខ្សែប្រយុទ្ធ Diogo Jota ទំនងអវត្តមានការប្រកួត Liverpool ទល់នឹង Arsenal នៅក្នុងជំនួបក្របខណ្ឌ Premier League ចុងសប្តាហ៍នេះ ដោយសាររបួសឆ្អឹងជំនី។

កីឡាករព័រទុយហ្កាល់ បានទទួលរងរបួសអំឡុងពេលការប្រកួតដែល Liverpool ឈ្នះ Chelsea ២-១ នៅក្នុងជំនួបលីគកំពូលអង់គ្លេស សប្តាហ៍ទី ៨ ក្រោយបានប៉ះទង្គិចជាមួយខ្សែការពារ Tosin Adarabioyo។

របួសនោះបានធ្វើអោយ Diogo Jota ត្រូវប្តូរចេញពីទីលាន ហើយគេក៏បានអវត្តមានការប្រកួត UEFA Champions League ដែល Liverpool ឈ្នះ RB Leipzig ១-០ កាលពីពេលថ្មីៗនេះដែរ។

ឥឡូវនេះ របាយការណ៍ពីសារពត៌មាន Football Insider បានបង្ហាញថា កីឡាករវ័យ២៧ឆ្នាំ អាចនឹងខកខានការប្រកួតទល់នឹងក្រុម Arsenal ថែមទៀត។ របួសឆ្អឹងជំនី មានស្ថានភាពមិនល្អ ដែលអាចនាំអោយ Diogo Jota ត្រូវសម្រាកព្យាបាលយ៉ាងហោចណាស់ ៦សប្តាហ៍។

គ្រូបង្វឹកលោក Arne Slot បាននិយាយយ៉ាងខ្លីអំពីស្ថានភាពរបស់ Jota ដោយបញ្ជាក់ថា ភាពឈឺចាប់របស់កីឡាករបានកើនឡើងបន្ទាប់ពីការប៉ះទង្គិចជាមួយកីឡាកររបស់ Chelsea ជាពិសេសនៅពេលដែល Adarabioyo ដួលលើគេ។ ឧបទ្ទវហេតុនេះបានធ្វើអោយ Jota មិនអាច បន្តលេង ហើយវាមិនអនុញ្ញាតអោយរូបគេធ្វើអ្វីធ្ងន់ធ្ងរទេនៅពេលនេះ។

អវត្តមានរបស់ Jota ច្បាស់ជានឹងមានផលប៉ះពាល់សម្រាប់ Liverpool ក្នុងការប្រកួតទល់នឹង Arsenal ខណៈដែលរូបគេបានដើរតួយ៉ាងសំខាន់ក្នុងការចាប់ផ្តើមរដូវកាលដ៏គួរអោយចាប់អារម្មណ៍របស់ក្រុមហង្សក្រហម។

Diogo Jota បានចូលរួមចំណែកស៊ុតបញ្ចូលចំនួន ៤ គ្រាប់ និងបញ្ជូនបាល់អោយមិត្តរួមក្រុមចំនួន ២ លើករួចមកហើយក្នុងការបង្ហាញខ្លួន ១០ ដងនៅគ្រប់ការប្រកួតទាំងអស់។ រូបគេក៏មានកំណត់ត្រាដ៏អស្ចារ្យក្នុងការប្រកួតរបស់ Liverpool ជាមួយ Arsenal នាពេលកន្លងមកដោយរូបគេស៊ុតបញ្ចូលទីបាន ៨ គ្រាប់ និង ចែកបាល់សម្រេចទី២ គ្រាប់ ក្នុង ១៥ប្រកួតទល់នឹងក្រុមកាំភ្លើងធំ នៅគ្រប់ការប្រកួតទាំងអស់៕

អត្ថបទទាក់ទង