ខ្សែការពារ William Saliba របស់ Arsenal ស្ថិតក្នុងការចង់បានពី Real Madrid

Premier League
October 31st, 2024 (1 year)
591 Views
Share

សារព័ត៌មាន Beinsports បានអោយដឹងថា ខ្សែការពារ William Saliba របស់ក្លិប Arsenal កំពុងស្ថិតក្នុងការចង់បានពីក្លិប Real Madrid។

ជាការពិត Real Madrid ត្រូវបានដឹងថាបានទាក់ទងអ្នកតំណាងរបស់កីឡាករបារាំង អំពីលទ្ធភាពនៃការផ្ទេររូបគេទៅកាន់ កីឡដ្ឋាន Santiago Bernabeu ក្នុងទីផ្សាររដូវក្តៅឆ្នាំ ២០២៥ ។

ក្រុមរហស្សនាមអធិរាជស ចង់ពង្រឹងទីតាំងខ្សែការពារកណ្តាល និងផ្តល់អាទិភាពក្នុងការជ្រើសរើសកីឡាករកំពូលក្នុងតំណែងនេះ ដើម្បីចាប់ដៃគូរជាមួយ Antonio Rudiger ស្របពេលដែល David Alaba និង Eder Militao ជួបបញ្ហារបួស។

ទោះបីជាយ៉ាងណាក៏ដោយ បច្ចុប្បន្នមិនមានសញ្ញាណាមួយពី William Saliba ថា រូបគេនឹងចាកចេញពី Arsenal នៅពេលណានោះទេ ដោយបច្ចុប្បន្ន កីឡាករវ័យ២៣ឆ្នាំ កំពុងមានភាពរីករាយនាកីឡដ្ឋាន Emirate ហើយមានភាគរយខ្ពស់ថា រូបគេនឹងមិនពិចារណាការចាកចេញទៅកាន់ទឹកដីអេស្ប៉ាញឡើយ។

William Saliba បានចាកចេញពី ក្លិប Saint-Étienne មកចូលរួម Arsenal កាលពីឆ្នាំ២០១៩ តែត្រូវបានបញ្ចេញអោយខ្ចីជើងជាបន្តបន្ទាប់នៅក្លិបដទៃដូចជាក្លិប Saint-Étienne, Nice និង Marseille។

យ៉ាងណាមិញ ក្រោយត្រឡប់មកចូលរួមជាមួយ Arsenal វិញ William Saliba បានក្លាយជាកីឡាករសំខាន់មួយរូបរបស់ក្រុមកាំភ្លើងធំ ដោយបានបង្ហាញខ្លួន ៨ ប្រកួតក្នុងចំណោម៩ប្រកួត នៅក្នុងការប្រកួតក្របខណ្ឌ Premier League នៅរដូវកាលនេះ ។

កាលពីរដូវក្តៅមុនទៀតសោត William Saliba បានបន្តកិច្ចសន្យារបស់គេជាមួយក្រុមកាំភ្លើងធំរហូតដល់ខែមិថុនា ឆ្នាំ ២០២៧ ឯណោះ៕

អត្ថបទទាក់ទង