West Ham United សម្លឹងឃើញបេក្ខភាពថ្មីទុកជំនួសតំណែងលោក Julen Lopetegui

Premier League
November 4th, 2024 (6 months)
333 Views
Share

មានការរាយការណ៍អោយដឹងថា ក្លិប West Ham United បានសម្លឹងឃើញបេក្ខភាពថ្មីហើយដើម្បីទុកជំនួស គ្រូបង្វឹកលោក Julen Lopetegui បើសិនរូបលោកត្រូវបណ្តេញចេញពីតំណែងនាពេលខាងមុខ។

West Ham United បានបណ្តេញលោក David Moyes ចេញកាលពីរដូវក្តៅ ហើយបានតែងតាំងលោក Julen Lopetegui មកកាន់តំណែងជាគ្រូបង្វឹកជាបន្ត។ ក្រុមញញួរយក្សបានបញ្ចប់ក្នុងចំណាត់ថ្នាក់ពាក់កណ្តាលតារាងក្របខណ្ឌ Premier League កាលពីរដូវកាលមុន ប៉ុន្តែពួកគេនៅតែចង់បានលទ្ធផលល្អប្រសើរជាងនេះ ទើបបានជាសម្រេចចិត្តចែកផ្លូវជាមួយលោក David Moyes ដូច្នេះពួកគេអាចប្រកួតប្រជែងបានជាមួយនឹងក្លិបធំៗដទៃ។

West Ham បានគាំទ្រលោក Lopetegui នៅក្នុងទីផ្សារដោះដូរកីឡាករ ហើយក្លិបបានចំណាយ នាំយកកីឡាករច្រើនបំផុតមិនធ្លាប់មាននាពេលកន្លងមក ដោយបានចុះហត្ថលេខាលើកីឡាករដូចជា Crysencio Summerville, Carlos Soler, Niclas Fullkrug និងកីឡាករផ្សេងទៀតដើម្បីបង្ហាញពីមហិច្ឆតារបស់ពួកគេ។ ទោះជាយ៉ាងណាក៏ដោយ រដូវកាលនេះ វានៅតែមានភាពមិនល្អប្រសើរខ្លាំងសម្រាប់ West Ham ដដែល ដោយពួកគេទើបតែបានឈ្នះការប្រកួតចំនួន ៣ ប៉ុណ្ណោះក្នុងចំណោម ១០ប្រកួតនៅក្របខណ្ឌ Premier League ។ ការបរាជ័យ ៣-០ ក្រោមថ្វីជើង Nottingham Forest ប្រហែលជារឿងគ្រប់គ្រាន់ដើម្បីសម្រេចអនាគតរបស់ លោក Lopetegui ដោយលោក អាចនឹងត្រូវបណ្តេញចេញពីតំណែង ។

យោងតាមកាសែត Daily Briefing បានអោយដឹងថា ក្លិប West Ham United ក៏បានសម្លឹងឃើញបេក្ខភាពថ្មី ដើម្បីទុកជំនួសលោក Julen Lopetegui ដែរ នោះគឺលោក Edin Terzic អតីតគ្រូបង្វឹក Borussia Dortmund។ បុរសវ័យ៤២ឆ្នាំ បានឈ្នះពានរង្វាន់ DFB-Pokal មុនពេលលាលែងពីតំណែងនៅ Dortmund ហើយសមត្ថភាពនៃការដឹកនាំរបស់លោក បានទាក់ទាញចំណាប់អារម្មណ៍ក្លិប West Ham United ក្នុងការនាំយករូបលោកមកកាន់តំណែងជាបន្ត។ ក្លិប West Ham United ជឿថា លោកEden Terzic អាចនឹងក្លាយជាអ្នកជួយក្លិបអោយមានភាពរស់រវើកឡើងវិញ និង អាចដោះស្រាយវិបត្តិដែលកំពុងកើតឡើង។

West Ham United ដែលកំពុងឈរចំណាត់ថ្នាក់លេខ ១៤ នៅ Premier League ត្រូវការគំនិតថ្មីៗ ពីគ្រូបង្វឹកដែលអាចធ្វើអោយប្រសើរឡើងនូវកម្រិតកីឡាករនៅក្នុងក្លិប ដែលជាអ្វីមួយដែល Lopetegui បានបរាជ័យ។ កន្លងមក លោក Edin Terzic ត្រូវបានផ្សារភ្ជាប់ជាមួយ Man UTD ដែរ ប៉ុន្តែក្រោយពីដំណឹងដែលក្លិបបិសាចក្រហមជិតនាំយកលោក Ruben Amorim នោះ ធ្វើអោយ West Ham មានផ្លូវងាយស្រួលក្នុងការនាំយកលោក Terzic មកជាគ្រូបង្វឹកថ្មី៕

អត្ថបទទាក់ទង