ខ្សែបម្រើ Declan Rice របស់ Arsenal នឹងបន្តចូលរួមការប្រកួតទោះមានបញ្ហាបាក់ឆ្អឹងម្រាមជើង

Premier League
November 8th, 2024 (1 year)
655 Views
Share

ប្រភពពីសារព័ត៌មាន BBC នៅអង់គ្លេសបានអោយដឹងថា ខ្សែបម្រើ Declan Rice នឹងបន្តចូលរួមការប្រកួតរបស់ក្រុម Arsenal នៅក្នុងជំនួបក្របខណ្ឌ Premier League ចុងសប្តាហ៍នេះទោះមានបញ្ហាបាក់ឆ្អឹងម្រាមជើងក្តី។

កីឡាករអង់គ្លេស បានទទួលរងបញ្ហារបួសនៅក្នុងការប្រកួត Premier League ដែល Arsenal បានចាញ់ Newcastle United ១-០។ របួសនេះបានធ្វើអោយរូបគេខកខានបង្ហាញខ្លួនក្នុងការប្រកួតដែល Arsenal ចាញ់ Inter Milan ១-០ ក្នុងការប្រកួតពានរង្វាន់ UEFA Champions League នាពេលកន្លងទៅ។

ទោះយ៉ាងណា ក្រោយខកខានបង្ហាញខ្លួនក្នុងការប្រកួតនាកីឡដ្ឋាន San Siro ដោយសាររបួសកីឡាករ វ័យ២៥ឆ្នាំ ត្រូវបានដឹងថា ត្រូវបានបញ្ចូលឈ្មោះ ក្នុងបញ្ជីកីឡាកររបស់ក្រុមកាំភ្លើងធំ សម្រាប់ការប្រកួតទល់នឹងក្រុមតោខៀវ Chelsea នៅកីឡដ្ឋាន Stamford Bridge។

បន្ថែមពីនេះ Declan Rice ក៏ត្រូវបានដឹងថា ត្រូវបានគ្រូបង្វឹកបណ្តោះអាសន្នក្រុមជម្រើសជាតិអង់គ្លេស លោក Lee Carsley បញ្ចូលឈ្មោះរូបគេទៅក្នុងបញ្ជីកីឡាករ២៦រូប សម្រាប់ការប្រកួត ពានរង្វាន់ UEFA Nations League ២ប្រកួតក្នុងខែវិច្ឆិកានេះដែរ ដោយអង់គ្លេសត្រូវធ្វើដំណើរទៅជួបក្រុមជម្រើសជាតិក្រិចនៅថ្ងៃទី ១៤ រួចបន្តស្វាគមន៍ក្រុមអៀរឡង់ នៅ៣ថ្ងៃបន្ទាប់ពីនោះ។

សម្រាប់វត្តមានរបស់ Declan Rice ក្នុងការប្រកួតរបស់ក្រុម Arsenal វិញ បានធ្វើអោយគ្រូបង្វឹកលោក Mikel Arteta មានភាពធូរស្រាលខ្លះដែរ ខណៈដែលបុរសជនជាតិអេស្ប៉ាញប៉ុនប៉ងស្វែងរកជ័យជំនះមកវិញ បន្ទាប់ពីចាញ់ការប្រកួត ដោយលទ្ធផល ១-០ ជាប់គ្នាចំនួនពីរប្រកួតមកហើយ។ ក្រៅពី Declan Rice ហើយ ដៃគូរបស់គេ គឺខ្សែបម្រើ Martin Odegaard ក៏បានវិលត្រឡប់មករួមក្រុម Arsenal វិញដែរ ក្រោយពីអវត្តមានជាង២ខែ ដោយសាររបួស។

ឆ្លងកាត់ការប្រកួត ចំនួន១០ដង នៅក្របខណ្ឌ Premier League ក្រុម Arsenal មានលទ្ធផល ឈ្នះ៥ ស្មើ ៣ ចាញ់២ មាន១៨ពិន្ទុឈរលេខ៥ក្នុងតារាងពិន្ទុ។ រីឯគូប្រកួត របស់ពួកគេ ដែលជាក្រុម Chelsea នោះ ឆ្លងកាត់១០ប្រកួត ឈ្នះ ៥ស្មើ៣ ចាញ់២ ដង មាន១៨ពិន្ទុដូចគ្នា កំពុងឈរលេខ៤ក្នុងតារាងពិន្ទុ៕

អត្ថបទទាក់ទង