អាជ្ញាកណ្តាល Premier League មួយរូបត្រូវរងបម្រាមក្រោយប្រមាថអតីតគ្រូបង្វឹក Liverpool លោក Jurgen Klopp

Premier League
November 12th, 2024 (3 months)
328 Views
Share

លោក David Coote អាជ្ញាកណ្តាលនៃក្របខណ្ឌ Premier League ត្រូវបានព្យួរការងារបន្ទាប់ពីវីដេអូបែកធ្លាយមួយដែលត្រូវបានចោទប្រកាន់ថា រូបលោកបានធ្វើការអត្ថាធិប្បាយប្រមាថអំពីក្រុម Liverpool និងអតីតគ្រូបង្វឹករបស់ពួកគេគឺលោក Jurgen Klopp។

ស្ថាប័នអាជ្ញាកណ្តាលអង់គ្លេស PGMOL បាននិយាយថា ការពិន័យនេះចូលជាធរមានដោយមានប្រសិទ្ធិភាពភ្លាមៗ ហើយកំពុងរង់ចាំការស៊ើបអង្កេតពេញលេញ។

លោក Coote វ័យ ៤២ ឆ្នាំបានកាត់ក្តីការប្រកួតដែល Liverpool ឈ្នះ ទល់នឹង Aston Villa ២-០កាលពីការប្រកួត Premier League សប្តាហ៍ទី១១។ លោកគឺជាមន្ត្រីអាជ្ញាកណ្តាលដែលមានបទពិសោធន៍ច្រើនមួយរូបរបស់ Premier League ហើយបានធ្វើជាអាជ្ញាកណ្តាលក្នុងការប្រកួតលីគកំពូលអង់គ្លេស ចាប់តាំងពីឆ្នាំ ២០១៨មក ។

ទោះយ៉ាងណា វីដេអូបែកធ្លាយ ដែលត្រូវបានចែករំលែកហាក់ដូចជាសំដៅទៅលើការប្រកួតក្របខណ្ឌ Premier League ដែលលោក Coote ដឹកនាំការប្រកួតរវាង Liverpool និង Burnley ក្នុងខែកក្កដាឆ្នាំ ២០២០ ដែលបានបញ្ចប់ក្នុងលទ្ធផល ១-១ ។ លោក Klopp ដែលកាលណោះនៅកាន់តំណែងជាគ្រូបង្វឹក Liverpool បានរិះគន់លោក Coote បន្ទាប់ពីចប់ការប្រកួត ដោយនិយាយថា អាជ្ញាកណ្តាលមិនបានពិន័យកីឡាករដែលមានកំហុសចំពោះការជែងយកបាល់ពីកីឡាកររបស់ Liverpool។

ទោះយ៉ាងណាក្រោយមក មន្ត្រីអាជ្ញាកណ្តាលោក David Coote បែរជាមានវីដេអូ និយាយរិះគន់លោក Jurgen Klopp ថាជាមនុស្សក្រអឺតក្រទម និងបាននិយាយពាក្យមិនល្អអំពីលោក Jurgen Klopp ជាច្រើនដងទៀត។

ទាក់ទិននឹងរឿងនេះស្ថាប័ន PGMOL បាននិយាយថា ខ្លួននឹងមិនធ្វើអត្ថាធិប្បាយបន្ថែមទេ រហូតដល់ការស៊ើបអង្កេតត្រូវបានបញ្ចប់ ប៉ុន្តែលោក David Coote នឹងត្រូវព្យួរការងារសិន។

មន្ត្រីអាជ្ញាកណ្តាលនៅអង់គ្លេសសុទ្ធតែត្រូវបានដឹងថា ពួកគេក៏មានក្លិបបាល់ទាត់ដែលខ្លួនគាំទ្រដែរ ហើយពួកគេនឹងមិនត្រូវអនុញ្ញាតអោយចូលរួមការប្រកួតរបស់ក្លិបនោះទេ ដើម្បីជៀសវាងការកាត់ក្តីដោយមិនសុក្រឹត។ តួយ៉ាង ដូចជាលោក David Coote មិនត្រូវបានអនុញ្ញាតិ អោយចូលកាត់ក្តីការប្រកួតរបស់ក្លិប Nottingham Forest ដែលជាក្លិបរូបលោកគាំទ្រនោះទេ៕

អត្ថបទទាក់ទង